Frantsııa prezıdenttigine úmitker «Eýropa Qurama Shtattaryn» qurýdy usyndy
ASTANA. KAZINFORM — 2027 jylǵy Frantsııa prezıdenti saılaýynda ońshyl-tsentrıstik «Renessans» partııasynan kandıdat Gabrıel Attal «Eýropanyń Qurama Shtattaryn» qurýǵa úndedi, dep habarlaıdy Anadoly.
Attal kelesi jyly ótetin saılaý naýqany aıasynda el boıynsha saparlaryn jalǵastyryp jatyr.
Burynǵy premer-mınıstr Attal keshe Reımstegi mıtıngte 27 memleketten turatyn Eýropalyq odaq (EO) óz múmkindikteriniń shegine jetkenin aıtty.
Qazirgi júıemen ári qaraı ilgerileý múmkin emes ekenin atap ótken Attal óz urpaǵynyń Eýropanyń quldyraýynyń kýási bolýyna kóngisi kelmeıtinin málimdedi.
— Men óz urpaǵymnyń Eýropanyń AQSh-tyń 51-shtatyna nemese Qytaıdyń 24-provıntsııasyna aınalǵanyn kórgenin qalamaımyn, — dedi Attal.
Onyń aıtýynsha, Eýropany barlyq jerde ony kúıreýge alyp bara jatqan ultshyldardyń yqpalynan shyǵaratyn ýaqyt keldi.
«Men birtutas memleket qurýdy usynbaımyn»
— Meniń oıymsha, urpaǵymnyń basty mindeti — Eýropa týraly armandy júzege asyryp, Eýropanyń Qurama Shtattaryn qurý, — dedi ol.
Onyń aıtýynsha, bul jobany júzege asyrý úshin «Eýropanyń Qurama Shtattarynyń» quramyna kiretin barlyq memlekette bir ýaqytta referendým ótkizýdi usynady.
— Árıne, men birtutas memleket qurýdy usynyp otyrǵan joqpyn, — dedi saıasatker.
Attal bul joba aıasynda aldymen ekonomıka men ekologııa salalarynda myqty ózek quraıtyn bir top Eýropa elin biriktirýdi kózdeıtinin aıtty. Sonymen qatar joba júzege asqan jaǵdaıda memleketter ózderiniń egemendik ókilettikterin, tilderi men ınstıtýttaryn saqtaıtynyn atap ótti.
Gabrıel Attal ózi usynyp otyrǵan «Eýropanyń Qurama Shtattary» aıasynda «ekonomıkalyq shekaralardy» tolyǵymen joıýdy kózdeıtinin málimdedi.
Aıta keteıik, Frantsııa prezıdenti saılaýynyń birinshi týry 2027 jylǵy 18 sáýirde, ekinshi týry 2 mamyrda ótedi.
Buǵan deıin Frantsııada benzın baǵasy tarıhı rekord jańartqanyn jazǵan bolatynbyz.
