Frantsııa prezıdenti jubaıyn qorǵaý úshin «ǵylymı dálelder» usynbaq

ASTANA. KAZINFORM — Politico basylymynyń habarlaýynsha, Frantsııa prezıdenti Emmanýel Makron men onyń jubaıy Brıjıt Makron AQSh-taǵy ýltraońshyl kommentator ári jazýshy Kendıs Oýenske jala japty degen aıyppen sotqa júgindi. 

Erli-zaıyptylar birinshi hanymǵa qatysty «transgender» degen málimdemeni «ǵylymı sıpattaǵy» saraptamalyq qorytyndylar arqyly joqqa shyǵarýdy josparlap otyr.

Kendıs Oýens birneshe ret Brıjıt Makrondy jynysyn aýystyrǵan áıel dep aıyptap kelgen. Buǵan jaýap retinde Frantsııanyń birinshi juby sot arqyly ózderiniń abyroıy men shyndyǵyn qorǵaýǵa bel býdy.

«Biz Brıjıt Makronǵa qatysty aıtylǵandardyń barlyǵy jalǵan ekenin tolyq kólemde dáleldeýge daıynbyz», — dedi Makrondar otbasynyń advokaty Tom Kler sheteldik BAQ-qa.

Onyń aıtýynsha, sot protsesinde «ǵylymı negizdegi» sarapshylardyń qorytyndylary usynylady.

Brıjıt Makron — úsh balanyń anasy. Ol Emmanýel Makronmen Amendegi mektepte sabaq bergen kezde tanysqan. Sol kezde bolashaq prezıdent oqýshy bolǵan, olardyń jas aıyrmasy 24 jyl.

Frantsııa prezıdenti tamyz aıynda jubaıymen birge K.Oýenske qarsy sotqa júginýge «mindetti» ekenin atap ótip, bul «shyndyqqa qurmet kórsetýdiń jalǵyz joly» ekenin aıtqan.

Sonymen qatar ol mundaı áreket «Streızand áserin» týǵyzýy múmkin ekenin, ıaǵnı máselege nazardy odan saıyn arttyrý qaýpin joqqa shyǵarmady.

Advokat Tom Klerdiń aıtýynsha, sot protsesinde prezıdent pen onyń jubaıy da kýálik beredi.

«Bul otbasy úshin atalǵan protsess asa aýyr ári qolaısyz. Alaıda, olardyń aıtylǵan aıyptaýlardyń jalǵan ekenin ashyq alańda dáleldeýge qanshalyqty senimdi ekenin kórsetedi», — dedi ol.

Buǵan deıin Makron zaıyby týraly jalǵan málimdeme jasaǵan áıeldi sotqa bergeni habarlanǵan bolatyn.