Frantsııa prezıdenti saıası partııa kóshbasshylarymen álemdegi jaǵdaıdy talqylamaq
ASTANA. KAZINFORM – Frantsııa Prezıdenti Emmanıýel Makron Le-Býrje qalasyndaǵy Parıj avıatsııalyq kórmesine áskerı ushaqpen kelip, baspasóz maslıhatynda Iran men Izraıl arasyndaǵy qaqtyǵysqa baılanysty parlamentte pikirtalas ótetinin málimdedi. Bul týraly Kazinform agenttiginiń menshikti tilshisi habarlaıdy.
Sondaı-aq Frantsııa prezıdenti eldegi saıası partııa kóshbasshylary Taıaý Shyǵys máselesimen qatar jaqynda Gaza men Ýkraınadaǵy jaǵdaı boıynsha da pikir almasý úshin jınalatynyn habarlady.
— Tańerteń Premer-mınıstrmen sóılestim, Iran men Izraıl arasyndaǵy qaqtyǵys boıynsha Konstıtýtsııamyzdyń 50-1-babyna sáıkes pikirtalas uıymdastyra alamyz dep úmittenemin, — dedi E. Makron.
Atalǵan konstıtýtsııalyq bap Úkimetke Senat nemese ulttyq assambleıa aldynda belgili bir másele boıynsha málimdeme jasaýǵa múmkindik beredi, onyń arty pikirtalasqa ulasady.
— Jaǵdaı turaqtala bastaǵan sátte men saıası partııalardy Iran, Gaza jáne Ýkraına máselesin talqylaý úshin «Sen-Denı formaty» aıasynda jınaımyn, — dep tolyqtyrdy E. Makron.
Osylaısha, atalǵan kezdesý kelesi aptada ótetin NATO sammıtinen keıin josparda baryn naqtylady.
Eske salsaq, 2023 jyly tamyzda Frantsııa prezıdenti Izraılde HAMAS jasaǵan shabýyldardan keıin Parlamentte usynylǵan partııalardyń kóshbasshylaryn Parıj mańyndaǵy Sen-Denı qalasyna shaqyrǵan bolatyn. Al aqpanda Makron Ýkraınadaǵy jaǵdaı men qaýipsizdik máselesin qaıta talqylaýǵa shaqyrdy.
Juma kúni Frantsııa prezıdenti Jenevada Parıj, Berlın jáne London Iran ókilderine ıadrolyq qarý máselesin, ballıstıkalyq qarý-jaraq jónindegi qyzmetti jáne óńirdegi lańkestik toptardy qarjylandyrýdy qamtıtyn jan-jaqty kelissóz júrgizýdi usynatynyn aıtty.
— ıAdrolyq qarýy bar Iran tóndiretin qaterdi eshkim elemeýi múmkin emes. Bul shynaıy qaýip. Biz naqty mazmundaǵy kelissózge qaıta oralýǵa basymdyq berýimiz qajet, — dep málimdedi Frantsııa prezıdenti.
Sondaı-aq E. Makron Izraıldi Irannyń azamattyq ınfraqurylymyna jasap jatqan soqqyny toqtatýǵa shaqyrdy.
Buǵan deıin habarlaǵanymyzdaı Jenevada Taıaý Shyǵystaǵy qaqtyǵysqa baılanysty Iran men Eýropa elderi arasyndaǵy kelissóz bastaldy.
Aıta ketsek, Iran men Izraıl arasyndaǵy shıelenis kúsheıe tústi.
Odan bólek Halyqaralyq atom energııasy jónindegi agenttik (MAGATE) Irannyń Arak qalasy mańynda salynyp jatqan ıadrolyq nysanǵa soqqy jasalǵanyn rastady. Bul rette VVS uıym eń mańyzdy ǵımarattarǵa zaqym keldi dep habarlaıdy.