Frantsııa poshtasy Rojdestvo qarsańynda kıbershabýylǵa ushyrady
ASTANA. KAZINFORM — Frantsııanyń ulttyq poshta operatory La Poste aýqymdy kıbershabýylǵa tap boldy. Bul týraly Euronews habarlady.
Dúısenbiden beri kompanııanyń saıty qoljetimsiz. Sálemdemelerdi jiberý men jetkizý aıtarlyqtaı qıyndap, olardy onlaın baqylaý múmkin bolmaı otyr.
El boıynsha poshta bólimshelerinde qyzmetkerler Rojdestvo aldyndaǵy eń qyzý kezeńde bolǵan DDoS-shabýylǵa baılanysty narazy klıentterdi sabyrǵa shaqyrýǵa májbúr.
Sonymen qatar La Poste-tyń bank bólimshesiniń klıentteri mobıldi qosymshalar arqyly óz akkaýnttaryna kire almaı otyr. Vedomstvo jeke derekterdiń qaýipsiz ekenin málimdedi. Ýaqytsha shara retinde tólemderdi SMS-habarlama arqyly rastaýǵa ruqsat berilgen.
Aıta keteıik, frantsýz poshtasynyń onlaın servısterindegi aqaýlar senbi kúni-aq bastalǵan. Alaıda La Poste bul da hakerlik shabýyl boldy ma, joq pa — naqty aıta almaı otyr.
Qazirgi tańda shabýyl úshin eshbir tarap jaýapkershilikti óz moınyna alǵan joq.
Buǵan deıin birneshe kún buryn Frantsııanyń Іshki ister mınıstrligi de kıbershabýylǵa ushyraǵan edi. Ózin hakermin dep tanystyrǵan adam 16,4 mıllıon frantsýz azamatynyń derekterine qol jetkizgenin málimdegen. Alaıda mınıstrlik bul aqparatty joqqa shyǵaryp, shabýyldaýshylar tek birneshe ondaǵan qujatty — polıtsııa hattamalary men izdeýde júrgen tulǵalar týraly derekterdi ǵana alǵanyn habarlady.
Іshki ister mınıstri Loran Nýnes bolǵan oqıǵany vedomstvodaǵy salǵyrttyq pen «tsıfrlyq gıgıenanyń» nasharlyǵymen túsindirdi.
Buǵan deıin Lývrdaǵy atyshýly urlyqqa baılanysty jańa málimetter paıda boldy.