Frantsııa Parıj ben ózge de qalalardyń merlerin tańdap jatyr
ASTANA. KAZINFORM – Búgin Frantsııada jergilikti ákimshilikterdiń saılaýy ótip jatyr, dep habarlaıdy Kazinform agenttiginiń AO-daǵy menshikti tilshisi.
Bul - Frantsııa saıasaty úshin mańyzdy naýqan. Eldegi 35 myńnan astam kommýnanyń turǵyndary aldaǵy alty jylǵa jańa merler men mýnıtsıpaldyq keńes múshelerin saılaıdy. Shamamen 49 mıllıon saılaýshy daýys berýge shaqyrylǵan. Olar 900 myń kandıdattyń arasynan tańdaý jasaıdy.
Bul saılaý 2027 jyly ótetin prezıdenttik saılaý aldyndaǵy saıası kúshterdiń ara salmaǵyn da ańǵartyp berýi múmkin.
Sarapshylardyń basty nazary ońshyl baǵyttaǵy National Rally partııasynyń iri qalalardaǵy pozıtsııasyn kúsheıte ala ma degen máselege aýyp otyr. Ásirese Marseille qalasyndaǵy jaǵdaı jáne Paris merligi úshin báseke nazarda.
Frantsııada merler saılaýshylar eń kóp senim artatyn saılanbaly tulǵalardyń biri sanalady. Jergilikti deńgeıdegi, «jergilikti máseleler» dep atalatyn problemalar qoǵamda aıtarlyqtaı qyzyǵýshylyq týdyrady. Odoxa–Backbone kompanııasynyń Le Figaro basylymy úshin júrgizgen sońǵy saýalnamasyna sáıkes, saılaýǵa qatysý deńgeıi shamamen 68 paıyz bolýy múmkin.
Bul jolǵy saılaý 2020 jylǵy naýqanǵa qaraǵanda tabystyraq ótedi degen boljam bar. Ol kezde saılaý COVID-19 pandemııasynyń áserinen qıyndap, daýys berýge kelmegenderdiń úlesi 55,3 paıyzǵa jetken edi.
Sonymen qatar baspasózdiń jazýynsha, Irandaǵy qaqtyǵys frantsýzdardyń nazaryn jergilikti saılaýdan birshama basqa jaqqa buryp jiberýi múmkin.
Osyǵan deıin Frantsııanyń Taıaý Shyǵysqa onǵa jýyq áskerı keme jiberýi múmkin ekeni týraly jazdyq.
