Frantsııa Palestınany moıyndady: BUU Bas Assambleıasynda Makron málimdeme jasady

NЬıÝ-IORK. KAZINFORM — Halyqaralyq qaýymdastyq mańyzdy dıplomatııalyq qadamnyń kýási boldy, dep habarlaıdy Kazinform agenttiginiń menshikti tilshisi.

Dúısenbi kúni Frantsııa prezıdenti Emmanıýel Makron Nıý-Iorkte ótip jatqan BUU Bas Assambleıasynyń otyrysynda sóılep, óz eliniń Palestına memleketin resmı túrde moıyndaıtynyn jarııalady.

Óz sózinde ol soǵysty birden toqtatyp, tutqyndardy bosatý qajettigin atap ótti.

— Tutqyndardy bosatatyn, soǵysty jáne qaıǵy-qasiretti toqtatatyn kez keldi, — dedi Frantsııa prezıdenti. — Biz beıbitshilikke qol jetkizýden aıyrylyp qalý qaýpimen betpe-bet keldik. Sondyqtan da búgin osynda jınaldyq.

Makron Parıjdiń bul sheshimin «barshaǵa arnalǵan beıbitshilik pen qaýipsizdik jospary men saıası úderistiń bastaýy» dep atady. Ol Frantsııanyń bul bastamasyn Belgııa, Malta jáne Lıýksembýrgtiń qoldaǵanyn, biraq G7 elderiniń ishinde Italııa men Germanııanyń ázirge bul qadamǵa barmaǵanyn atap ótti.

— Bul — elimizdiń úlken dıplomatııalyq jeńisi, — dep málimdedi Frantsııanyń syrtqy ister mınıstri Jan-Noel Barro.

Ol Parıjdiń bul qadamyn HAMAS-ty úzildi-kesildi qabyldamaý dep baǵalady.

Alaıda Parıjdiń bul sheshimi Izraıl tarapynan qatań synǵa ushyrady. Izraıl Premer-mınıstri Bınıamın Netanıahý Iordan ózeniniń batys jaǵalaýynda palestınalyq memlekettiń qurylmaıtynyn málimdedi. Prezıdent Itshak Gertsog Palestınany moıyndaý «qarańǵy kúshterge batyldyq beredi» dep atap ótti. Izraıldiń BUU-daǵy elshisi bul otyrysty «tsırk» dep atady.

Makron sondaı-aq Gaza sektorynda ótpeli ákimshilik qurýdy usyndy. Bul ákimshilikke Palestına ákimshiligi qatysyp, HAMAS-ty taratý protsesin baqylaý mindeti júktelmek.

Ol Frantsııanyń Gaza sektoryndaǵy «turaqtandyrý mıssııasyna» úles qosýǵa daıyn ekenin málimdep, bul aımaqta halyqaralyq qaýipsizdik kúshteriniń bolýy múmkin ekenin meńzedi.

Sonymen qatar, Makron Frantsııa Palestınada elshilik ashýǵa tek HAMAS tutqyndaǵy adamdardy tolyq bosatqan soń jáne atysty toqtatý týraly kelisim jasalǵannan keıin ǵana kirisetinin aıtty.

Buǵan deıin habarlanǵandaı, 23 qyrkúıekte Qazaqstan Prezıdenti Qasym-Jomart Toqaev BUU Bas Assambleıasynyń 80-jyldyǵyna arnalǵan Jalpy pikirsaıystyń ashylýyna qatysady dep josparlanǵan.