Frantsııa Palestınany memleket retinde resmı tanýǵa sheshim qabyldady
ASTANA. KAZINFORM – Frantsııa prezıdenti Emmanýel Makron áleýmettik jelide Parıjdiń Palestınany derbes memleket retinde tanýǵa daıyn ekenin málimdedi. Onyń aıtýynsha, bul týraly resmı málimdeme qyrkúıek aıynda BUU Bas Assambleıasynyń jańa sessııasynda jasalady, dep habarlaıdy VVS.
«Taıaý Shyǵysta ádiletti ári berik beıbitshilikti qamtamasyz etý jónindegi tarıhı mindetimizge berik bola otyryp, men Frantsııanyń Palestına memleketin taný týraly sheshim qabyldadym. Bul týraly qyrkúıek aıynda BUU Bas Assambleıasynda saltanatty túrde jarııalaımyn», – dep jazdy Emmanýel Makron H áleýmettik jelisindegi paraqshasynda.
Postqa ol Palestına avtonomııasynyń basshysy Mahmud Abbasqa joldaǵan resmı hatyn da qosa jarııalady.
Frantsııa basshysynyń pikirinshe, táýelsiz Palestına memleketi Taıaý Shyǵystaǵy qaýipsizdikti qamtamasyz etýge óz úlesin qosa alady, biraq bul úshin Palestına tarapy Izraıldi tolyq ári sózsiz moıyndap, qarýly qurylymdardan bas tartýy tıis.
«Qazir eń bastysy – dereý atysty toqtatý, barlyq tutqyndardy bosatý jáne Gaza turǵyndaryna jappaı gýmanıtarlyq kómek kórsetý», – dedi Makron.
Sondaı-aq ol HAMAS qozǵalysyn qarýsyzdandyrý, Gaza sektorynda qaýipsizdikti qamtamasyz etý jáne aımaqty qalpyna keltirý qajet ekenin atap ótti.
Palestına bıligi Frantsııanyń bul sheshimin quptap qarsy aldy.
Al Izraıl premer-mınıstri Bınıamın Netanıahý bul qadamdy «terrorǵa berilgen marapat» dep atady.
«Mundaı jaǵdaıda Palestına memleketi Izraılmen beıbit qatar ómir súrý úshin emes, ony joıý úshin platsdarmǵa aınalady. Palestınalyqtar Izraılmen qatar ómir súretin memleket qurýdy kózdemeıdi, olar Izraıldiń ornyna óz memleketin qurýdy maqsat etedi», – delingen Netanıahý málimdemesinde.
Qazirgi tańda BUU-ǵa múshe 193 eldiń 140-tan astamy Palestınany egemen memleket retinde moıyndaǵan. Sońǵy bolyp, shamamen bir jyl buryn Irlandııa, Ispanııa jáne Norvegııa bul qadamǵa barǵan bolatyn.
Aıta keteıik, Palestına boıynsha BUU konferentsııasy 28-30 shildege josparlanǵan.