Frantsııa palestınalyqtarǵa kómek retinde 100 mıllıon eýro bóledi
Beısenbi kúni ótken halyqaralyq konferentsııada Frantsııa prezıdenti Emmanıýel Makron Frantsııa úkimeti Palestına halqyna gýmanıtarlyq kómek kórsetý úshin qosymsha 80 mıllıon eýro bóletinin, kómektiń jalpy kólemin 100 mıllıon eýroǵa jetkizetinin málimdedi, dep habarlaıdy Kazinform agenttigi Euronews arnasyna silteme jasap.
Frantsııa prezıdenti 50-den astam eldiń ókilderi qatysqan Gaza sektoryndaǵy beıbit turǵyndarǵa gýmanıtarlyq kómek kórsetýge arnalǵan halyqaralyq konferentsııada sóz sóıledi.
Konferentsııanyń negizgi taqyryptarynyń biri - jergilikti turǵyndardy dári-dármekpen, sýmen, jaryqpen jáne azyq-túlikpen qamtamasyz etý boldy.
Makron Izraıldi beıbit turǵyndardy qorǵaýǵa shaqyryp, «barlyq jerde ómir qundylyqtary birdeı» jáne terrorızmmen kúres «eshqashan erejesiz bitpeıtinin» aıtty.
Ol gýmanıtarlyq kómektiń Gaza sektoryna jetýine múmkindik berý úshin áskerı áreketterge úzilis jasaýǵa shaqyrdy.
«7 qazanda Frantsııa Palestına halqyna 20 mıllıon eýro kóleminde gýmanıtarlyq kómek kórsetetinin jarııalaǵan bolatyn, endi bul somany bıyl 100 mıllıon eýroǵa jetkizemiz», - dedi Makron.
Ol sondaı-aq barlyq elderdi Birikken Ulttar Uıymy arqyly palestınalyq beıbit turǵyndarǵa kómek kórsetýge shaqyrdy.
Frantsııa prezıdenti BUU baǵalaýy boıynsha Gaza sektory men Batys jaǵalaý turǵyndaryna 1,2 mlrd dollar (1,12 mlrd eýro) kóleminde gýmanıtarlyq kómek qajet ekenin atap ótti.
Makron jekelegen elderdiń Gaza sektorynyń turǵyndaryna kómek kórsetý jónindegi bastamalaryn joǵary baǵalady, onyń ishinde parashıýtpen medıtsınalyq qajettilikter jetkizgen Iordanııa, dalalyq gospıtal qurý boıynsha BAÁ, teńiz gýmanıtarlyq dálizin uıymdastyrýdy usynǵan Kıpr, sondaı-aq áýe kópirin qurǵan EO bar.
«Búgingi konferentsııa da kúsh-jigerimizdi biriktirýge kómektesedi dep úmittenemin», - dedi Makron.
Eýrokomıssııa tóraǵasy Ýrsýla fon der Lıaıen EO palestınalyqtarǵa gýmanıtarlyq kómek kórsetý kólemin tórt esege arttyrǵanyn atap ótti.
Palestına premer-mınıstri Mohammed Shtaıeniń aıtýynsha, «Gazada saǵat saıyn alty bala óledi».
