Frantsııa Olımpıadaǵa qansha qarajat jumsap, qansha tabys tapty

ASTANA. KAZINFORM — 2024 jylǵy Olımpıadany ótkizýge Frantsııa qansha qarajat jumsady? Boljamdar Parıjge 6,7-den 11,1 mlrd eýroǵa deıin qarjylyq paıda keledi deıdi. Alaıda naqty tsıfr keıinirek jarııalanady, dep habarlaıdy Euronews.  

Parıj Olımpıadasy men Paralımpıada oıyndary aıaqtaldy jáne Frantsııaǵa qazir álemdegi eń iri sport sharasyn ótkizý úshin 8 mlrd eýrodan astam qarjy shyǵyndaýǵa týra keldi. 

Eger túpkilikti shyǵyn ózgerissiz qalatyn bolsa, onda Parıj sońǵy onjyldyqtaǵy eń arzan jazǵy oıyndardy ótkizgeni belgili boldy (2020 jylǵy Tokıoda ótken Olımpıada oıyndaryna 12 mlrd eýrodan astam qarjy jumsalǵan). 

Bul Frantsııa astanasynyń jańa nysandar salýdyń ornyna tolyǵymen derlik qalada bar nysandarǵa súıenýine baılanysty. 

Frantsııa astanasynyń Choose Paris Region ekonomıka jáne týrızmdi damytý agenttiginiń málimetinshe, naqty tsıfr aıtýǵa áli erte bolsa da, aldyn ala málimet qazirdiń ózinde kóńil kónshitedi. 

«Jaǵymdy jaıt, Olımpıada jáne Paralımpıada osy kezeńinde bizge byltyrǵy jazǵa qaraǵanda 500 myń týrıst kóbirek keldi. Bul, árıne, belgili bir ekonomıkalyq áser etedi. Sheteldik týrıster biz kútkennen de kóp boldy. Bul jaǵdaıda bizde kóp aqsha jumsaıtyn klıent bar. Biraq biz áli de ekonomıkalyq paıdanyń túpkilikti nátıjesin kútemiz», — dedi agenttik basshysy Aleksandra Dýblansh.

Quqyq jáne sport ekonomıkasy ortalyǵynyń (CDES) málimetinshe, bul shara Parıj aımaǵyna 6,7 jáne 11,1 mlrd eýro kóleminde qarjylyq paıda ákelýi múmkin.

Naqty sandar birneshe aıdan keıin jarııalanady.