Frantsııa meshitindegi kisi ólimine kúdikti Italııa polıtsııasyna ózi berildi

PARIJ. KAZINFORM — Abýbakar esimdi 24 jastaǵy jigitti meshitte 40-50 ret pyshaqtaǵannan aýyr jaraqat alyp, mert boldy, dep jazdy Anadoly agenttigi. 

Frantsııanyń La-Gran-Komb kommýnasyndaǵy meshitte bolǵan ıslamofobııalyq shabýylǵa kúdikti er adam Italııanyń Pıstoıa qalasynda polıtsııaǵa ózi berildi.

Qazir Olıve H. esimdi kúdikti Frantsııaǵa ekstradıtsııalanýdy kútip otyr.

Jergilikti prokýratýranyń málimetinshe, bul shabýyl terrorlyq áreket retinde baǵalanýy múmkin.

Frantsııa premer-mınıstri Fransýa Baırý oqıǵany «ıslamofobııalyq jıirkenish» dep atady. Eldiń kóptegen saıasatkerleri de bul shabýyldy qatań aıyptady.

Frantsııa Islam Keńesi (CFCM) bul oqıǵany «antııslamdyq terrorıstik shabýyl» dep baǵalap, ony qatań aıyptady.

Sonymen qatar, CFCM frantsýz BAQ-tarynyń oqıǵa jaıly bastapqyda «eki musylman arasyndaǵy janjal» dep jalǵan aqparat taratqanyn jáne oqıǵanyń antııslamdyq sıpatyn eleýsiz qaldyrýǵa tyrysqanyn atap ótti.

Keńes bul jaǵdaıdy «asa alańdatarlyq» dep baǵalap, Frantsııadaǵy musylman qaýymyna osyndaı shabýyldardyń aldyn alý úshin asa muqııat bolýǵa keńes berdi.

Qandy oqıǵa 25 sáýir, juma kúni jergilikti ýaqytpen tańǵy 8:30 shamasynda boldy. Hatıdje meshitinde namaz kezinde belgisiz bireý bir musylmanǵa pyshaqpen shabýyl jasaǵan. 24 jastaǵy Abýbakar esimdi jigit aýyr jaraqat alyp, 40-50 pyshaq jaraqatynan qaza tapty. Shabýyldaýshy bul sumdyq áreketti uıaly telefonyna túsirip, áleýmettik jelilerge jarııalaǵan.

Eske sala keteıik, buǵan deıin Frantsııada 15 jastaǵy jasóspirim úsh oqýshyǵa pyshaq jaraqatyn salǵan bolatyn.