Frantsııa men Japonııada Airbus jańartýyna baılanysty 130 reıs toqtatyldy
ASTANA. KAZINFORM – Airbus ushaqtaryndaǵy baǵdarlamalyq qamtamasyz etýdi shuǵyl jańartý saldarynan Air France avıakompanııasy 35 reısin, al japon tasymaldaýshylary keminde 95 reısin toqtatty. Bul týraly Kazinform tilshisi habarlaıdy.
BFMTV málimetinshe, Airbus A320 serııasyna kiretin 6000-nan astam áýe kemesiniń bir bóligin jańartý týraly talap jarııalanǵannan keıin Air France juma kúni Frantsııa áýejaılarynan ushýy tıis 35 reısti keri qaıtarǵan. Kompanııa ókili naqty ózgerister týraly aqparatty senbiniń keshinde jarııalaıtynyn jáne túnde jańartylǵan keste shyǵatynyn aıtqan.
Frantsııanyń kólik mınıstri Fılıpp Tabaro barlyq avıakompanııalarda, sonyń ishinde Air France-te de, kestede kidirister bolýy múmkin ekenin eskertip, jolaýshylarǵa reıs mártebesin aldyn ala tekserýge keńes berdi.
Reuters derekterine súıensek, Japonııanyń eń iri áýe kompanııasy All Nippon Airways (ANA) senbi kúni 95 reısti toqtatyp, 13,5 myń jolaýshyǵa áser etken. ANA jáne onyń enshiles Peach Aviation kompanııasy Japonııadaǵy A320 ushaqtarynyń eń úlken parkin paıdalanady.
Ońtústik Koreıada Asiana Airlines jańartýlar tek 17 áýe kemesine qatysty bolǵandyqtan, eleýli keste buzýshylyq bolmaıtynyn málimdedi. Al Korean Air 10 ushaǵyn qaıta paıdalanýǵa engizý úshin jumys júrgizip jatqanyn habarlady. Eldiń kólik mınıstrligi jeksenbiniń tańyna deıin 42 ushaqtaǵy jańartýlar tolyq aıaqtalady dep kútýde.
Birqatar avıakompanııalar keń aýqymdy irkilisterdiń joq ekenin habarlady. Wizz Air jańartý óz ushaqtarynyń bir bóligine ǵana áser etkenin, tehnıkalyq jumystar josparlanǵanyn, biraq demalys kúnderi keı reısterdiń ózgerýi múmkin ekenin málimdedi.
British Airways talap úsh qysqa baǵytta ushatyn A320 ushaǵyna ǵana qatysty ekenin jáne kestege áser etpeıtinin habarlady. Turkish Airlines barlyq reısterdi qalypty rejımde oryndap jatqanyn aıtty.
Eske salaıyq, Airbus kompanııasy bıiktik róli basqarylatyn kompıýterdiń operatsııalyq baǵdarlamasyn dereý jańartýdy mindetteıtin ushý jaramdylyǵy jónindegi dırektıva shyǵarǵan edi.
Qazaqstanda da Airbus ushaqtary tekserilip, jańartýlar júrgizildi. Almaty áýejaıy jańartýǵa baılanysty reısterdiń keshigýi múmkin ekenin habarlaǵan bolatyn.