Frantsııa men Ulybrıtanııa atys toqtaǵannan keıin Ýkraınaǵa ásker jiberýge daıyn
ASTANA. KAZINFORM — Frantsııa men Ulybrıtanııa Ýkraına aýmaǵynda atysty tolyq toqtatqannan keıin óz áskerlerin ornalastyrý nıetin rastady. Bul sheshim «Batyldar koalıtsııasy» men AQSh usynǵan qaýipsizdik kepildikteri paketi aıasynda qabyldanyp otyr jáne Reseı tarapynan bolashaqta qaıta shabýyl jasaý qaýpiniń aldyn alýǵa baǵyttalǵan. Bul týraly Euronews jazdy.
Bul mindetteme seısenbi kúni Parıjde ótken «Batyldar koalıtsııasy» sammıtiniń qorytyndysy boıynsha Frantsııa prezıdenti Emmanýel Makron, Ulybrıtanııa premer-mınıstri Kır Starmer jáne Ýkraına prezıdenti Vladımır Zelenskıı qol qoıǵan resmı deklaratsııada bekitildi.
Qujatqa sáıkes, Frantsııa men Ulybrıtanııa jetekshilik etetin kópultty kúshter qaqtyǵys shebinen tys aýmaqtarda — qurlyqta, áýede jáne teńizde ornalastyrylady. Makronnyń aıtýynsha, bul qadam Reseıdiń Ýkraınaǵa qaıta shabýyl jasaýyna jol bermeý úshin qajetti «senimdilik faktoryn» qamtamasyz etýge tıis. Operatsııaǵa Túrkııa da qatysyp, teńiz arqyly qoldaý kórsetedi.
Ulybrıtanııa premer-mınıstri Kır Starmerdiń málimdeýinshe, atysty toqtatqannan keıin eki el Ýkraına aýmaǵynda áskerı habtar quryp, qarý-jaraq pen áskerı tehnıkany saqtaýǵa arnalǵan qorǵalǵan nysandar salýdy josparlap otyr. Bul Ýkraına Qarýly kúshteriniń qorǵanys qajettilikterin qoldaýǵa baǵyttalǵan.
Qaýipsizdik kepildikteri paketi sondaı-aq AQSh jetekshilik etetin atysty toqtatýdy baqylaýdyń joǵary tehnologııalyq tetigin jáne Reseı tarapynan jańa shabýyl jasalǵan jaǵdaıda Ýkraınaǵa kómek kórsetý jónindegi zańdy mindettemeni qamtıdy. Bul mindetteme NATO-nyń ujymdyq qorǵanysqa arnalǵan 5-babyna uqsas úlgide qalyptastyrylýy múmkin jáne áskerı, logıstıkalyq, ekonomıkalyq ári dıplomatııalyq qoldaýdy kózdeıdi.
Alaıda bul bastamalardy iske asyrý úshin olardy koalıtsııaǵa múshe elderdiń ulttyq parlamentteri ratıfıkatsııalaýy qajet. Ýkraınany qoldaý deńgeıi tómendep jatqan keıbir memleketterde bul úderis kúrdeli bolýy múmkin. Al AQSh-ta qujatty bekitý úshin ol Kongress qaraýyna usynylady.
Sonymen qatar koalıtsııaǵa kiretin árbir eldiń kópultty kúshterge qosatyn naqty úlesi men ujymdyq qaýipsizdik jónindegi mindettemeler aıasyndaǵy jaýapkershiligi ázirge naqtylanǵan joq.
Aıta keteıik, Zelenskııdiń málimdeýinshe, Kıev AQSh kóshbasshylarynyń sammıtin qańtardyń sońyna deıin ótkizýdi josparlap otyr.