Frantsııa men Saýd Arabııasy Palestına memleketin moıyndatý úshin BUU-da sammıt ótkizýge shaqyrǵan
NЬıÝ-IORK. KAZINFORM — BUU-da Taıaý Shyǵysta beıbit retteýdiń taǵdyryn aıqyndaı alatyn kezdesý bastaldy, dep habarlaıdy Kazinform agenttiginiń menshikti tilshisi.
Dúısenbi kúni Nıý-Iorktegi BUU-nyń shtab-páterinde Frantsııa men Saýd Arabııasynyń uıymdastyrýymen sammıt bastaldy. Kezdesýdiń maqsaty — eki memleket qaǵıdasyna halyqaralyq qoldaýdy nyǵaıtý jáne Palestına memleketin resmı túrde moıyndatý.
Álemdik kóshbasshylar aldynda alǵashqylardyń biri bolyp Frantsııa prezıdenti Emmanıýel Makron sóz sóıledi. Ol óz sózinde Frantsııanyń Palestına memleketin resmı túrde moıyndaǵanyn málimdedi.
Odan keıin Saýd Arabııasynyń syrtqy ister mınıstri Feısal bın Farhan ál-Saýd sóz alyp, taq murageri Muhammed bın Salmannyń atynan BUU-ǵa úndeý jasady.
Ol Makronǵa Palestına memleketin moıyndaǵany úshin alǵys bildirip, eki memleket týraly sheshim – aımaqta ádil ári turaqty beıbitshilikke qol jetkizýdiń jalǵyz joly ekenin taǵy da atap ótti.
Sóz sóılegenderdiń qatarynda BUU Bas hatshysy Antonıý Gýterrısh te boldy.
Al Palestına prezıdenti Mahmýd Abbas jınalǵandarǵa beınebaılanys arqyly ún qatty — AQSh onyń delegatsııasyna vıza berýden bas tartty.
Ulybrıtanııa, Kanada, Aýstralııa jáne Portýgalııa Palestınany moıyndaǵanyn jarııalady.
Búgin olarǵa Belgııa, Lıýksembýrg, Malta, San-Marıno jáne Andorra qosylady. Parıj bul tek sımvoldyq qadam emes, saıası protsestiń bastalýy ekenin alǵa tartty.
— Nıý-Iork deklaratsııasy — bul belgisiz bolashaqqa ýáde emes, naqty jol kartasy. Ol eń mańyzdy úsh máseleni qamtıdy: atysty toqtatý, tutqyndardy bosatý jáne Gazaǵa gýmanıtarlyq kómekti kedergisiz jetkizý, — dedi Frantsııanyń syrtqy ister mınıstri Jan-Noel Barro.
Izraıl men AQSh sammıtke boıkot jarııalady. AQSh pen Izraıl ókilderi bul sharaǵa qatyspady.
Izraıldiń BUU-daǵy turaqty ókili Danı Danon kezdesýdi «tsırk» dep atady. Izraıl premer-mınıstri Bınıamın Netanıahý Batys jaǵalaýdyń bir bóligin anneksııalaý múmkindigin qarastyryp jatqanyn aıtyp, Iordan ózeniniń batys jaǵalaýynda Palestına memleketi qurylmaıtynyn eskertti.
Izraılde Frantsııaǵa qarsy sharalar, sonyń ishinde dıplomatııalyq qatynasty jáne qaýipsizdik salasyndaǵy yntymaqtastyqty shekteý máselesi qarastyrylyp jatyr. Vashıngton da Izraıl múddesine qarsy shyqqan elderge saldary bolýy múmkin ekenin málimdedi.
Sammıt áskerı áreketterdiń ýshyǵýy aıasynda ótip jatyr: Izraıl Gaza qalasyna jerústi shabýyldaryn kúsheıtip, sektorǵa soqqylaryn jalǵastyryp jatyr. Jergilikti bıliktiń málimetinshe, qaza tapqan palestınalyqtardyń sany 65 myńnan asty.