Frantsııa men Saýd Arabııasy HAMAS-ty Gazadaǵy bılikten shettetpeı qarýsyzdandyrý máselesin talqylap jatyr

ASTANA. KAZINFORM – Parıj men Er-Rııad palestınalyq toptyń bolashaq basqarý qurylymyna ishinara qosylýy onyń qarýsyzdandyrý múmkindigin arttyrady dep shamalap otyr.

Frantsııa men Saýd Arabııasy HAMAS-ty qarýsyzdandyrýǵa jáne ony Gaza sektoryn basqarýda shekteýli yqpalyn saqtaıtyn taza saıası kúshke aınaldyrýǵa baǵyttalǵan birlesken bastamany ázirlep jatyr. 

Bul týraly Bloomberg agenttigi habarlady. 

Saýd Arabııasynyń ókilderi qazirdiń ózinde HAMAS basshylyǵymen kelissóz júrgizip jatyr, al Eýropalyq Odaqtyń HAMAS-ty lańkestik uıym dep tanyǵanyn eskere otyryp, Frantsııanyń bul toppen tikeleı dıalogqa qatysýy-qatyspaýy áli belgisiz. 

HAMAS-tyń belgili bir saıası róldi saqtap qalýy toptyń qarýsyzdanýǵa kelisim berý yqtımaldyǵyn arttyrýy múmkin dep shamalanyp otyr. 

- Maqsat – bul topty bolashaqta Palestınanyń basqarýynda áli de ról atqara alatyn taza saıası uıymǵa aınaldyrý, - dep habarlaıdy agenttik anonımdi derekkózge silteme jasap. 
Alaıda Izraıl HAMAS-ty Gaza sektorynyń saıası ómirinen tolyǵymen alyp tastaýdy talap etip, mundaı bastamadan bas tartýy múmkin.

Frantsııa men Saýd Arabııasy 2025 jyldyń maýsymynda BUU-da eki memleket týraly sheshimin ilgeriletý úshin birlesken konferentsııa ótkizedi dep kútilip otyr. Іs-shara aıasynda Frantsııa Palestına memleketin moıyndaıtynyn jarııalaı alady, bul HAMAS-ty 2023 jyldyń 7 qazanynda jasaǵan shabýyly úshin yntalandyrý dep qarastyratyn Izraıldiń ótkir reaktsııasyn týdyrýy múmkin. 

Izraıl premer-mınıstri Bınıamın Netanıahý sársenbi kúni sóılegen sózinde Izraıl Gaza sektoryndaǵy soǵysty toqtatatyn naqty sharttardy atady. 

- Men Gazadaǵy soǵysty Izraıldiń qaýipsizdigin qamtamasyz etetin naqty sharttarmen toqtatýǵa daıynmyn: barlyq kepilge alynǵandar úılerine oralady, HAMAS qarýyn tastaıdy, bılikten ketedi jáne onyń basshylyǵy aımaqtan qýylady, - dedi Netanıahý.

Izraıl premer-mınıstriniń málimdemesine jaýap retinde HAMAS qarýyn tapsyrý jáne basshylyǵyn elden shyǵarý múmkindigin joqqa shyǵaryp, olardyń «Palestına halqynyń bir bóligi ekenin» basa aıtty. 

Osy arada Izraıl Gaza sektorynda HAMAS-ty tolyǵymen joıyp, aımaqtyń barlyq aýmaǵynda baqylaý ornatýǵa baǵyttalǵan «Gıdeon arbasy» áskerı operatsııasyn jalǵastyryp jatyr. 

Izraıl armııasy bul operatsııanyń maqsaty sondaı-aq Gaza sektoryndaǵy HAMAS pen basqa da qarsylasý toptarynyń tolyq «jeńilýin» qamtamasyz etýge baǵyttalǵanyn málimdedi. 

Halyqaralyq qaýymdastyq, sonyń ishinde Frantsııa, Ulybrıtanııa jáne Kanada gýmanıtarlyq jaǵdaıǵa alańdaýshylyq bildirip, atysty tez arada toqtatýǵa jáne gýmanıtarlyq kómek kórsetýge shaqyrady.

Buǵan deıin Izraıl qaıtadan Gaza sektoryna gýmanıtarlyq kómek jetkizýge ruqsat bergenin jazǵan bolatynbyz. 

Gýmanıtarlyq júk tıelgen 190-nan astam júk kóligi Gaza sektoryna jetti.

Vashıngtonda Izraıl elshiliginiń eki qyzmetkeri oqqa ushty.