Frantsııa men Italııa Lıvannyń ońtústigine áskerı kontıngent ornalastyrmaq
ASTANA. KAZINFORM — Italııa men Frantsııa BUU-nyń Lıvandaǵy ýaqytsha bitimgerlik kúshteri (UNIFIL) mıssııasy aıaqtalǵannan keıin eldiń ońtústigine áskerı kontıngent ornalastyrýǵa daıyndalyp jatyr, dep habarlaıdy Kazinform agenttiginiń Eýropalyq odaqtaǵy menshikti tilshisi.
Bul týraly Frantsııa Syrtqy ister mınıstrligindegi derekkóz «Al-Arabııa» telearnasyna málimdedi.
Derekkózdiń aıtýynsha, joba AQSh pen birqatar Eýropa eliniń qoldaýymen júzege asyrylady. Jańa áskerı kontıngent Lıvan bıliginiń resmı ótinishi negizinde eldiń ulttyq armııasyn kúsheıtý jáne óńirdegi turaqtylyqty saqtaý maqsatynda ornalastyrylady.
— Parıj sondaı-aq Lıvan men Izraıl arasyndaǵy sońǵy negizdemelik kelisimge baılanysty qaýipsizdik sharalaryn eskere otyryp, kúshterdi ornalastyrýdyń túpkilikti tetigin kelisý úshin seriktestermen konsýltatsııalar jalǵasyp jatqanyn atap ótti, — dep habarlady «Ál-Arabııa».
2025 jyly BUU Qaýipsizdik Keńesi UNIFIL mıssııasyn aıaqtaý týraly qarar qabyldady. Áskerdi tolyq shyǵarý 2027 jylǵa deıin aıaqtalýy tıis.
Mıssııa Lıvan men Izraıl arasyndaǵy atysty toqtatý rejımin baqylaý maqsatynda 1978 jyly qurylǵan bolatyn.
2006 jylǵy qarýly qaqtyǵystan keıin onyń mandaty edáýir keńeıtildi. Kontıngenttiń eń joǵary kezeńdegi sany 15 myń áskerı qyzmetshige deıin jetken.
Maýsym aıynyń basynda Izraıl buqaralyq aqparat quraldary AQSh ákimshiligi Lıvannyń ońtústigindegi BUU bitimgerlik kúshterin qoldaýdy toqtatý múmkindigin qarastyryp jatqanyn habarlaǵan edi.
Eske salaıyq, Italııa men Frantsııa dástúrli túrde UNIFIL mıssııasyna eń kóp áskerı qyzmetshi jiberetin elderdiń qatarynda. Jańa bastama Frantsııa prezıdenti Emmanıýel Makron men Italııa premer-mınıstri Djordja Melonı arasyndaǵy kelissózderden keıin jarııalandy.
