Frantsııa men Italııa qorǵanys salasyndaǵy strategııalyq áriptestikti nyǵaıtyp jatyr
ASTANA. KAZINFORM – Frantsııa prezıdenti Emmanıýel Makron men Italııa premer-mınıstri Djordja Melonı Frantsııa men Italııa arasyndaǵy 36-úkimetaralyq sammıtke qatysty, dep habarlaıdy Kazinform agenttiginiń Belgııadaǵy menshikti tilshisi.
Kezdesý Lazýr jaǵalaýyndaǵy Kap-d’Antıbte ótip, 2021 jyly qabyldanǵan Kvırınal shartynyń júzege asyrylýyn ilgeriletýdegi kezekti qadam boldy. Frantsııa men Italııa kóshbasshylary Jerorta teńizine qaraıtyn kórikti Eilenroc vıllasynda kelissóz ótkizdi. Jumys sessııalary bastalar aldynda olar Antıbtegi Pıkasso mýzeıine de bardy.
Sammıt barysynda Makron men Melonı ekijaqty jáne eýropalyq yntymaqtastyqtyń keń aýqymdy máselelerin talqylady. Taraptar qorǵanys salasyndaǵy jol kartasyn, sondaı-aq qorǵanys ónerkásibi men energetıkaǵa qatysty birqatar kelisimderdi qarastyrdy.
Parıj ben Rım Jerorta teńizindegi kóshi-qon aǵyndaryn basqarý máselesinde ortaq ustanymǵa ıe. Sonymen qatar Tende asýynyń astynan ótetin tonnel qurylysy jáne basqa da transshekaralyq jobalar ilgerilep keledi.
Eýroodaq sarapshylarynyń pikirinshe, Antıbtegi sammıt kóshi-qon máselesindegi kelispeýshilikterge baılanysty biraz ýaqyt salqyndaǵan qarym-qatynastan keıingi alǵashqy iri ekijaqty kezdesý boldy.
Kezdesý Parıj ben Rımniń saıası ustanymdaryndaǵy aıyrmashylyqtarǵa qaramastan, pragmatıkalyq yntymaqtastyqqa basymdyq berýge daıyn ekenin kórsetti.
Eske sala ketsek, byltyr da saıasatkerler kezdesip, Makron men Melonı arasyndaǵy kelissózderdiń úsh saǵattan astam ýaqytqa sozylǵany habarlanǵan edi.
