Frantsııa men Ispanııadaǵy órtten 200 myńnan astam adam evakýatsııalandy
ASTANA. KAZINFORM – Frantsııanyń ońtústik-batysy men Ispanııanyń ortalyǵynda tutanǵan iri orman órtteri saldarynan 200 myńnan astam adam evakýatsııalandy. Ispanııada alǵash ret orman órtterine baılanysty tótenshe jaǵdaı rejımi jarııalandy, dep habarlaıdy Euronews.
Frantsııanyń Atlant muhıty jaǵalaýyndaǵy Kap-Ferre túbegi tolyqtaı evakýatsııalandy. Týrıster men jergilikti turǵyndar qurlyqpen qatar teńiz arqyly da qaýipsiz jerge kóshirildi.
Jıronda departamentindegi órt sársenbi kúni Bordo qalasynan 60 shaqyrym jerde bastalyp, qazirdiń ózinde shamamen 125 sharshy shaqyrym aýmaqty sharpydy. Frantsııanyń Іshki ister mınıstri Loran Nýnestiń málimetinshe, Jırondadan 110 myń, kórshiles Land departamentinen taǵy 31 myń adam evakýatsııalanǵan.
Órtpen myńǵa jýyq órt sóndirýshi kúresip jatyr. Olardyń ondaǵany kúıik pen túrli jaraqat alǵan. Jırondada 80 turǵyn úı men bir kempıng janyp ketken.
Frantsııa ІІM deregine sáıkes, el aýmaǵynda qazir 32 orman órti tirkelgen. Jyl basynan beri 50 myń gektardan astam orman órtenip, bul ótken jyldyń kórsetkishinen shamamen úsh ese kóp.
Ispanııada Madrıd pen kórshiles Avıla provıntsııasyndaǵy órtter baqylaýdan shyǵyp, úsh iri órt oshaǵy bir-birine qosylý qaýpin týdyrǵan. Osyǵan baılanysty elde alǵash ret orman órtterine baılanysty tótenshe jaǵdaı rejımi engizildi.
Frantsııa men Ispanııa Eýroodaqtyń Azamattyq qorǵanys tetigi arqyly kómek surady. Frantsııaǵa Horvatııa, Portýgalııa, Chehııa jáne Slovakııadan avıatsııalyq qoldaý kórsetiledi. Eýrokomıssııa Ispanııaǵa Grekııa men Italııadan tórt Canadair amfıbııalyq ushaǵyn jiberetinin habarlady.
Órt daǵdarysy Italııanyń Sıtsılııa aralyn da qamtydy. Aýa temperatýrasynyń 40 gradýstan joǵary bolýy, tómen ylǵaldylyq pen kúshti jeldiń saldarynan órt birneshe jerde taralyp, bir órt sóndirýshi qaza tapty.
Aıta keteıik, buǵan deıin Frantsııadaǵy áıgili kýrorttyq túbek turǵyndary alapat orman órtine baılanysty tegis evakýatsııalanǵanyn jazdyq.
Oǵan deıin Frantsııadaǵy orman órtinen 20 myń adam evakýatsııalanǵany habarlandy.
