Frantsııa men Ispanııadaǵy alapat orman órti: 320 myńnan astam adam evakýatsııalandy
ASTANA. KAZINFORM — Frantsııanyń ońtústik-batysynda tabıǵı órttiń saldarynan 220 myńnan astam adam evakýatsııalandy. Orman órtin sóndirýge shamamen 1 400 órt sóndirýshi, 1 500 áskerı qyzmetker, 1 700 qaýipsizdik kúshteriniń qyzmetkeri jáne arnaıy avıatsııa jumyldyrylǵan, dep habarlaıdy
Senbige qaraǵan túni Bordo qalasynyń mańyndaǵy taǵy bes eldi mekenniń turǵyndaryn evakýatsııalaý týraly sheshim qabyldandy. Jergilikti bıliktiń málimetinshe, qýraǵan ósimdikter men qatty jeldiń áserinen órt óte jyldam taralǵan.
Senbi keshine qaraı Jıronda departamentinde tilsiz jaý shamamen 32 700 gektar aýmaqty sharpydy. Órt seısenbi kúni Somos kommýnasynda bastalyp, apta sońyna qaraı Le-Porj jáne Lej-Kap-Ferre aýdandaryna jetti. Demalys kúnderi jalyn Bordo aglomeratsııasy baǵytyna qaraı tarala bastady.
Eýropalyq komıssııanyń tóraıymy Ýrsýla fon der Lıaıen Frantsııaǵa rescEU ortaq eýropalyq avıatsııalyq rezervinen bes ushaq pen eki tikushaq jiberilgenin málimdedi.
Frantsııa bıliginiń deregine sáıkes, jyl basynan beri el aýmaǵynda shamamen 100 myń gektar jer órtengen. Eldiń Іshki ister mınıstri Loran Nýnes bul kórsetkishti «tarıhı eń joǵary deńgeı» dep atady.
Orman órtteri Landy, Var jáne Joǵarǵy Alpi departamentterinde de jalǵasyp jatyr.
Sonymen qatar, Ispanııada Madrıd mańy men Avıla provıntsııasynda orman órtteri áli de órship tur. El úkimeti eki óńirdegi ahýalǵa baılanysty ulttyq deńgeıdegi tótenshe jaǵdaı rejımin engizdi. Qaýipti aımaqtardan shamamen 100 myń adam evakýatsııalandy.
Ispanııa Іshki ister mınıstrliginiń málimetinshe, Eýropalyq odaqtyń azamattyq qorǵanys tetigi órtpen kúreske qajetti resýrstardy jumyldyrǵan. Italııa 14 qutqarýshy maman men eki Canadair órt sóndirý ushaǵyn, Portýgalııa 129 maman men 41 arnaıy tehnıkany, al Grekııa 33 maman, eki Canadair ushaǵy jáne bir qosymsha áýe kemesin jiberdi.
Madrıd avtonomııalyq qaýymdastyǵyndaǵy ortalyq úkimettiń ókili Fransısko Martın Agırre aldaǵy birneshe saǵattyń sheshýshi bolatynyn aıtty.
Al Ispanııa premer-mınıstri Pedro Sanches qazirgi basty mindet – adam ómirin saqtaý, jergilikti qaýymdastyqtardy qorǵaý jáne órtti aýyzdyqtaý ekenin málimdedi. Onyń aıtýynsha, barlyq deńgeıdegi bılik organdary kúsh pen resýrstardy biriktirip jumys istep jatyr. Sondaı-aq zardap shekken óńirlerge qalpyna keltirý kezeńinde memlekettik qoldaý kórsetiletin bolady.
Aıta ketelik Frantsııadaǵy orman órtinen 50 myń gektardan astam aýmaq joıylyp ketkeni týraly jazǵan edik.
