Frantsııa men Ispanııa reseılikter úshin vıza talaptaryn qatańdatty
ASTANA. KAZINFORM — Frantsııa Reseı men Belarýs azamattary úshin óziniń teńiz aýmaqtaryna kirý erejelerin qatańdatty. Bul týraly 16 maýsym, dúısenbi kúni Reseı týroperatorlar qaýymdastyǵy habarlady, dep jazdy DW.
Buǵan deıin atalǵan aýmaqtarǵa barý úshin reseılikter men belarýstyqtarǵa 6 aıdan kem emes merzimge berilgen frantsýzdyń C sanatyndaǵy kóp mýltıvızasy jetkilikti bolsa, endi arnaıy DFA vızasyn rásimdeý qajet.
Al Ispanııa reseı azamattarynan ıspan áýejaılarynda aýysyp miný kezinde tranzıttik vıza talap etpekshi.
Áńgime kelesi aýmaqtar týraly bolyp otyr: Frantsýz Polınezııasy, Jańa Kaledonııa, Ýollıs pen Fýtýna, Gvadelýpa, Martınıka, Sen-Marten, Sen-Bartelemı, Reıýnon, Maıotta, Frantsýz Gvıanasy, Sen-Per men Mıkelon.
Jańa talaptar uzaq merzimdi D sanatyndaǵy frantsýz vızasy barlarǵa, sondaı-aq Shengen aımaǵy men Eýropalyq ekonomıkalyq aımaq elderinde turýǵa ruqsaty bar azamattarǵa qatysty emes. (EEA quramyna EO elderimen qatar Islandııa, Norvegııa jáne Lıhtenshteın kiredi.)
Ispanııa reseılikter úshin tranzıttik vızalardy engizedi
2024 jyldyń 12 shildesinen bastap Ispanııanyń halyqaralyq áýejaılarynda aýysyp minetin reseı azamattary úshin TAP sanatyndaǵy tranzıttik vızany rásimdeý mindetti bolady. Bul týraly Ispanııanyń Máskeýdegi konsýldyǵy óz saıtynda jarııalady. Bul talap Shengen vızasy bar nemese Eýroodaq elderinde turýǵa ruqsaty bar azamattarǵa qoldanylmaıdy.
Aıta keteıik, 2022 jyldyń qarashasynda Chehııa, al 2023 jyldyń qyrkúıeginde Ulybrıtanııa reseılikter úshin áýejaılyq tranzıttik vızalardy engizgen bolatyn. Sonymen qatar, Reseı azamattaryna Frantsııa arqyly tranzıtpen ushý úshin de vıza qajet, eger olar Armenııa, Ázerbaıjan, Belarýs, Grýzııa, Mysyr, Moldova, Túrkııa nemese Ýkraınadan ushatyn bolsa.
2024 jyldyń mamyr aıynda Norvegııa reseılik týrısterge elge kirýge de, basqa Shengen elderine tranzıt arqyly ótýlerine de tyıym saldy.
Eske sala keteıik, Qazaqstanǵa 87 eldiń azamaty vızasyz kele alady.