Frantsııa men Belgııaǵa «Gorettı» daýyly soqty

ASTANA.KAZINFORM — Belgııa men Frantsııanyń keı aımaqtaryna «Gorettı» daýyly soǵyp, aýa raıy kúrt nasharlady, dep habarlaıdy Kazinform agenttigi.

Daýyl sońy jańbyr men qarǵa ulasyp, jeldiń ekpini kúsheıdi. Frantsııanyń Mansh departamentiniń soltústik-shyǵys jaǵalaýyndaǵy Barflerde jel ekpinniń jyldamdyǵy saǵatyna 213 km-ge (130 mıl/saǵ) jetti.

Frantsııanyń soltústiginde jáne batysynda jıyrmaǵa jýyq departament joǵary dabyl jarııalady (qyzǵylt sary dabyl deńgeıi).

Bretan, Normandııa jáne Paı-de-la-Lýar aımaǵyna poıyz qatynasy toqtatyldy.

Mansh jáne Sena-Marıtım departamentterinde mektepter jabyldy.

Sonymen qatar, Bretande shamamen 20 000 úı, Paı-de-la-Lýar departamentinde 7000 úı jáne Normandııada 5000 úı, jalpy el boıynsha 50 000 úı jaryqsyz qaldy.

Brıýsselde bılik aǵashtar turǵyndardyń ústine qulap ketýi múmkin dep qaýiptenip, barlyq qoǵamdyq saıabaqtar men alańdardy jabýdy buıyrdy.

— Brıýssel aımaǵy barlyq alańdardy, saıabaqtardy jáne Sonıan ormanyn jaýyp jatyr. Jeldiń ekpini saǵatyna 70-ten 90 km-ge deıin jetýi múmkin. Brıýssel qorshaǵan ortany qorǵaý agenttiginiń málimeti boıynsha, bul kelýshilerdiń qaýipsizdigine qaýip tóndirýi múmkin, — dep málimdedi bılik.

Buǵan deıin Parıjde jaýǵan qar shamamen 900 km sozylǵan kólik keptelisin týdyrǵanyn habarlaǵan edik.