Frantsııa men Belgııada «Kırk» daýyly soqty
ASTANA. KAZINFORM – Frantsııanyń Sena jáne Marna departamentinde sý tasqyny týraly eskertýdiń qyzyl deńgeıi saqtalyp otyr. Belgııanyń Kýven qalasynyń ortalyǵyn sý basty, dep habarlaıdy Euronews.
Frantsııada soqqan «Kırk» daýyly saldarynan bir adam qaza tapqan. Bul týraly jergilikti BAQ habarlady.
Daýyl kesirinen 70 myńǵa jýyq úı jaryqsyz qaldy. Eldiń soltústiginde joldar men ǵımarattardyń tómengi qabattaryn sý basty. Sena jáne Marna departamentinde aldaǵy kúnderi taǵy jaýyn-shashyn boljanǵanyna baılanysty sý tasqyny týraly dabyldyń qyzyl deńgeıi saqtalyp otyr.
«Kırk» daýyly Frantsııamen kórshiles Belgııaǵa da áser etti. Koroldiktiń ońtústiginde jaýyn-shashyn mol jaýdy. Kýven men onyń mańynda kúrdeli jaǵdaı saqtalyp, ondaǵy adamdar men janýarlardy armııa tikushaǵymen evakýatsııalaýǵa týra keldi.
Jergilikti bılik aýyr jaǵdaı artta qaldy, endi apattyń saldaryn joıý kerek dep shamalap otyr.
Eske sala ketsek, «Mılton» daýyly túnde Florıda shtatynyń ortalyq bóligimen ótip, sońy tornadoǵa ulasty, shtattaǵy on shaqty úı qırady. 3 mıllıonnan astam úı men kásiporyn jaryqsyz qaldy. Sońǵy málimetke sáıkes, Florıdada «Mılton» daýyly qurbandarynyń sany 14 adamǵa jetti.
Buǵan deıin AQSh-ta 5 mln-ǵa jýyq adam evakýatsııalaý týraly buıryq alǵany habarlanǵan bolatyn.
Florida State University, University of Florida, University of South Florida jáne University of Miami-de bilim alyp júrgen qazaqstandyq stýdentter úıinde otyr. Oqý oryndary ýaqytsha jabylyp, oqý protsesi toqtatyldy.
Halyqaralyq baǵdarlamalar ortalyǵy «Mılton» daýylynyń Florıdaǵa jaqyndaǵanyna baılanysty jaǵdaıdy baqylap otyr.
