Frantsııa men BAÁ JI derekter ortalyǵyn salady

ASTANA. KAZINFORM — Frantsııa men BAÁ 30-dan 50 mlrd dollar shamasynda ınvestıtsııa kózdeıtin qýattylyǵy 1 gıgavatt derekter ortalyǵyn salý týraly negizdemelik kelisimge keldi, dep habarlaıdy Kazinform menshikti tilshisi.

Reuters agenttiginiń derekterine súıensek, beısenbi kúni prezıdent Emmanýel Makron óziniń ámirliktegi áriptesi sheıh Mohammed ben Zaıd Ál-Nahaııandy qabyldady. Kezdesý kelesi aptada Parıjde ótetin jasandy ıntellekt sammıti qarsańynda ótti. Atalmysh sammıtte jasandy ıntellekttiń áleýetin talqylaý úshin 100-ge jýyq el bas qosady dep kútilýde.

10-11 aqpanda ótetin sammıt Frantsııa men Eýropany jasandy ıntellekt kartasyna shyǵarýǵa baǵyttalǵan. Sebebi olar energııa kóp qajet etetin tehnologııa salasynda jetekshi memleketter AQSh jáne Qytaımen básekelesýge tyrysady.

— Eki el kóshbasshylary JI salasynda strategııalyq seriktestik qurýǵa nıet bildirdi. Sonymen qatar olar JI salasynda qun tizbegin damytýdy qoldaıtyn jobalar men ınvestıtsııalar boıynsha yntymaqtastyq múmkindikterin zertteýge mindettendi, — delingen birlesken málimdemede.

Eki el de ınvestıtsııalar frantsýz jáne ámirliktiń jasandy ıntellektine, ozyq chıpterdi, derekter ortalyqtaryn satyp alýǵa, talanttardy damytýǵa baǵyttalatynyn atap ótti. Sondaı-aq qos tarap jasandy ıntellekt pen bulttyq tehnologııalardyń egemendi ınfraqurylymyn qurýǵa múmkindik beretin vırtýaldy derekter elshilikterin qurýǵa nıetti ekenin alǵa tartty.

Alǵashqy ınvestıtsııalar týraly habarlandyrý osy jyldyń sońynda Choose France sammıtinde jasalatyn kórinedi.

Eske salsaq, budan buryn Kazinform tilshisi Frantsııanyń jańa mınıstrler kabıneti ekonomıkany qalaı damytatynyn saralap kórdi.