Frantsııa memlekettik qyzmetshilerge arnalǵan messendjerin ázirledi

ASTANA. KAZINFORM — Bıylǵy jyldyń 1 qyrkúıeginen bastap Frantsııa úkimetiniń barlyq mınıstrligi Tchap qaýipsiz memlekettik jedel habar almasý qyzmetin paıdalanýǵa mindetti, dep habarlaıdy Kazinform menshikti tilshisi. 

— Bul qaýipsizdik pen egemendiktiń ımperatıvi, — dep jazdy Le Figaro. 

Tchap qyzmetiniń ataýy — birinshi optıkalyq baılanys ádisteriniń birin oılap tapqan 18 ǵasyrdaǵy frantsýz ınjeneri Klod Shappaǵa qurmet kórsetý.

Osy dúısenbiden bastap barlyq frantsýz memlekettik qyzmetshileri men memlekettik departamentteri kásibı hat almasý úshin qaýipsiz Tchap jedel habar almasý qyzmetin paıdalanýǵa mindetti.

Osylaısha, WhatsApp, Signal jáne Telegram ruqsat etilgen qyzmet tiziminen shyǵarylǵan.

— Jalpy jurtshylyqqa baǵyttalǵan jedel habar almasýdyń negizgi qosymshalary bizdiń kúndelikti kommýnıkatsııalarymyzda barǵan saıyn mańyzdy ról atqaryp otyr. Alaıda bul tsıfrlyq quraldardyń qaýipsizdik kemshilikteri joq emes, — delingen premer-mınıstr Fransýa Baırýdyń jazdyń ortasynda qol qoıǵan tsırkýlıarynda.

Bul mátin barlyq memlekettik qyzmetkerden, sonyń ishinde mınıstrlik keńseleriniń qyzmetkerlerinen Vedomstvoaralyq tsıfrlyq basqarmasy (DINUM) ázirlegen Tchap qosymshasyn ornatýyn talap etti.

Buǵan deıin Máskeýdegi barlyq mektep MAH messendjerine kóshiriletinin jazǵan bolatynbyz. 

Al elimizde Aitu messendjerin aı saıyn 500 myńǵa jýyq adam paıdalanatynyn jazǵanbyz. Ulttyq messendjerdiń jańa múmkindikteri týraly myna materıaldan oqı alasyz.