Frantsııa lıtseılerinde smartfondarǵa tyıym salý kúshine endi
ASTANA. KAZINFORM — Búgin Frantsııa prezıdenti Emmanıýel Makron oqý jylynyń bastalýyna jáne lıtseılerde smartfon qoldanýǵa tyıym salýdyń engizilýine baılanysty Lozer departamentiniń Mend qalasyndaǵy Shaptal lıtseıine barady, dep habarlaıdy agenttiktiń EO-daǵy tilshisi.
Prezıdentpen birge bilim mınıstri Edýard Jeffreı de lıtseıge barady.
Elıseı saraıy taratqan habarlamaǵa sáıkes, Makron oqýshylarmen jáne ustazdarmen lıtseılerde smartfon qoldanýǵa tyıym salý máselesin talqylaıdy.
Jańa erejege sáıkes, oqýshylardyń telefondary óshirilip, sómkelerinde saqtalýy kerek. Medıtsınalyq maqsatta, ashanada, mektep-ınternatta, sondaı-aq oqý protsesine baılanysty jaǵdaılarda mektep ákimshiliginiń sheshimimen smartfon qoldanýǵa ruqsat etilýi múmkin.
Erejeni buzǵan jaǵdaıda smartfon tárkilenýi múmkin. Bul shara 2018 jyldan beri kolledjderde qoldanylyp kele jatqan tyıymdy lıtseılerge de engizýdi jáne balalardyń ekran aldynda ótkizetin ýaqytyn qysqartýdy kózdeıdi.
— Kámeletke tolmaǵandardy ekran aldynda shamadan tys ýaqyt ótkizýden qorǵaý jónindegi ustanymyn jalǵastyra otyryp, Memleket basshysy oqýshylarmen jáne muǵalimdermen lıtseılerde uıaly telefon qoldanýǵa tyıym salý máselesin talqylaıdy, — dep málimdedi prezıdent ákimshiligi.
Buǵan deıin Aýǵanstannyń memlekettik qyzmetkerlerine smartfon paıdalanýǵa tyıym salynǵan bolatyn.
Sondaı-aq, smartfonnyń saýsaqtarǵa zııany qandaı jáne odan qalaı saqtanýǵa bolatyny týraly jazdyq.
