Frantsııa Qazaqstandy Eýropa halqyna tanystyra bastady
L’Essentiel des Relations Internationales jýrnalynyń búgingi shyǵarylymy – qazaq-frantsýz qarym-qatynasynyń damýyna kúmánsiz úles. Mundaı pikirdi QR Prezıdenti janyndaǵy Qazaqstan strategııalyq zertteýler ınstıtýtynyń bas sarapshysy Ádil Káýkenov aıtty, dep habarlaıdy Kazinform.
«Frantsııa Prezıdenti Emmanýel Makronnyń bıyl qarashadaǵy Qazaqstanǵa sapary kezinde Qytaıdyń jańalyqtar qyzmetine bergen suhbatymda qazaq-frantsýz qarym-qatynasy jaıly birqatar tezıs usynǵan edim. Sol jaıynda eske salaıyn. Birinshiden, Frantsııa — Qazaqstanmen strategııalyq yntymaqtastyq týraly shartqa qol qoıǵan birinshi eýropalyq el boldy. Qazirgi ýaqytta geosaıasatta daýyl soǵyp tur. Biraq osyndaı jaǵdaıda Frantsııa Prezıdenti Makronnyń sapary Qazaqstanmen qarym-qatynastyń joǵary deńgeıiniń kórsetkishine aınaldy. Dál osy ótken sapardyń tarıhı mıssııasyn bildiredi. Ekinshiden, Eýropa saıasatkerler men iri bıznesti esepke almasaq, Qazaqstan jáne búkil Ortalyq Azııa jaıly ázirshe óte az biledi. Biz frantsýz ádebıeti men tarıhyn bilgenimizben, frantsýzdar qazaqstandyq mádenıettiń jáne jalpy búkil elimizdiń jetistikteri jaıly bile bermeıdi. Árıne, bul aıtarlyqtaı aqparattyq teńgerimsizdikti qalyptastyrady jáne Qazaqstannyń Eýropadaǵy múmkindikterin shekteıdi», — dep jazdy Ádil Káýkenov Facebook paraqshasynda.
Degenmen sarapshy Emmanýel Makronnyń Astanaǵa sońǵy sapary jaǵdaıdy ózgerte bastaǵanyn tilge tıek etti.
«L’Essentiel des Relations Internationales jýrnalynyń búgingi shyǵarylymy Qazaqstanǵa arnaldy. Búkil Frantsııada, Monakoda, Belgııada, Lıýksembýrgte jáne frankotildes Afrıka elderinde satylatyn bul basylym halyqaralyq saıasatqa mashyqtanǵan. Búkil álemde 300 mln-nan astam adam ana tili nemese memleket tili retinde frantsýz tilinde sóıleıdi. ıAǵnı, Qazaqstan týraly aqparat osynaý úlken naryqqa kásibı turǵyda ilgerileıdi. Bul - elimiz úshin birshama jaǵymdy jańalyq. Jýrnalda Qasym-Jomart Toqaev pen Emmanýel Makronnyń kezdesý qorytyndysy boıynsha saraptama, Qazaqstan jaıly jalpy aqparat jáne qazaqstandyq mınıstrlikter men memlekettik kompanııalardyń top-menedjerlerimen birqatar suhbat basylǵan», — dedi ol.
Sarapshy endigi ýaqytta Eýropada Qazaqstan, jalpy Ortalyq Azııa týraly aqparat tapshylyǵy qysqaryp, yntymaqtastyq úshin zor múmkindikter ashylatynyn aıtady.
«Memleket basshylary arasyndaǵy kezdesý qorytyndysy tek qana birlesken málimdeme emes, dál osylaı azamattarǵa paıdaly aqparattardy ilgeriletý de bolýy tıis. L’Essentiel des Relations Internationales jýrnalynyń búgingi shyǵarylymy — qazaq-frantsýz qarym-qatynasynyń damýyna kúmánsiz úles», — dedi Ádil Káýkenov.
Buǵan deıin atalǵan jýrnalda Memlekettik keńesshi Erlan Qarınniń «Qazaqstannyń jasampaz kúntártibi» dep atalatyn maqalasy jarııalanǵanyn jazǵan edik.
