Frantsııa qalalarynda paralımpıada alaýy jaǵyldy

ASTANA. KAZINFORM – Brıtandyqtar Paralımpıada alaýyn frantsýz sportshylaryna tabys etti. Olar eki alaýdy Frantsııa qalalarymen alyp ótedi, dep jazady Euronews.

Stok Mandevıll aýylynan shyqqan alaý ustaýshylar frantsýz áriptesterimen jarty jolda kezdesti. Olardyń arasynda paralımpıada qozǵalysynyń jáne alǵashqy paralımpıada oıyndarynyń negizin qalaýshy Lıýdvıg Gýttmannyń shóberesi Lora Mılls bar.

Qale kommýnasyndaǵy týnneldiń shyǵysynda taǵy 11 alaý jaǵyldy. Frantsýzdardy barynsha paralımpıadanyń alaý jaǵý estafetasyna tartý jáne múmkindigi shekteýli jandardyń ómirine jurtshylyq nazaryn aýdarý maqsatynda alaý jaǵýshylar Frantsııa qalalaryn aralap ótti.

Bul rásim 28 tamyz kúni Parıjde aıaqtalady. Dál osy kúni Paralımpıadanyń negizgi alaýy jaǵylady. Sporttyq jarystar 8 qyrkúıekke deıin jalǵasady.

Qazaqstan paralımpıadashylary Paralımpıada oıyndaryna segizinshi ret qatysady. 1996 jyldan qazirgi ýaqytqa deıin bizdiń sportshylar Jazǵy Paralımpıada oıyndarynda 7 medal (2 altyn, 4 kúmis jáne 1 qola) jeńip aldy. Buǵan deıin Premer-Mınıstr Oljas Bektenov 2024 jyly ótetin XVII jazǵy Paralımpıada oıyndary qarsańynda Qazaqstan quramasynyń múshelerimen kezdesip, Qazaqstannyń memlekettik týyn tabystap, sáttilik tilegen bolatyn.

XVII Jazǵy Paralımpıada oıyndaryna qatysatyn paralımpıadashylardyń alǵashqy legi Parıjge attandy.