Frantsııa Irandy sýpermarketterdiń tońazytqyshtaryn qashyqtan isten shyǵardy dep aıyptady
ASTANA. KAZINFORM — Frantsııa Irannyń Islam revolıýtsııasy saqshylar korpýsyn sýpermarketterdiń tońazytqysh júıelerine jasalǵan aýqymdy kıbershabýylǵa qatysy bar dep aıyptady. Bul týraly Frantsııanyń Syrtqy ister mınıstri Jan-Noel Barro málimdedi, dep habarlaıdy Kazinform agenttigi BBC-ge silteme jasap.
Mınıstrdiń aıtýynsha, bul — Frantsııa aýmaǵynda buryn-sońdy bolmaǵan aýqymdy kıbershabýyldardyń biri. Ol eldiń ulttyq qaýipsizdigine qater tóndirgen.
Barro shabýylǵa qatysy bar tulǵalarǵa Eýropa elderi birlesip sanktsııa salatynyn málimdedi. Sondaı-aq Frantsııa Syrtqy ister mınıstrligi Irannyń Parıjdegi elshisin shaqyryp, oǵan resmı narazylyq bildirdi.
Frantsııa bıligi bul oqıǵaǵa baılanysty basqa da jaýap sharalaryn qabyldaý múmkindigin qarastyryp jatyr.
11–12 qazanda Frantsııanyń ár óńirindegi júzdegen sýpermarketke kıbershabýyl jasaldy. Hakerler tońazytqysh júıelerin basqaratyn baǵdarlamalyq jasaqtamaǵa kirip, muzdatqyshtar men tońazytqysh kameralaryndaǵy temperatýrany qashyqtan kótergen. Keıbir kameralarda temperatýra 50 gradýsqa deıin jetken.
Saldarynan dúkenderdegi azyq-túlik ónimderi buzylyp, birneshe mıllıon eýro shyǵyn kelgen. Coopérative U saýda jelisiniń 100-den astam dúkeni, Intermarché jáne Netto jelileriniń 180 saýda núktesi zardap shekti. Carrefour, Monoprix jáne E.Leclerc sııaqty iri saýda jelilerinde de aqaýlar tirkeldi.
BBC málimetinshe, hakerler tońazytqysh qondyrǵylaryn qashyqtan basqarýǵa múmkindik beretin Danııanyń Danfoss kompanııasy ázirlegen baǵdarlamalyq jasaqtamaǵa shabýyl jasaǵan.
2 qarashada osyndaı kıbershabýyldar Eýropanyń taǵy toǵyz elinde, sonyń ishinde Fınlıandııa, Shvetsııa, Belgııa, Italııa jáne Nıderlandta tirkeldi. Sol joly 100-den astam dúken zardap shekken.
Parıj prokýratýrasy Islam revolıýtsııasy saqshylar korpýsymen baılanysy bar «Shahıd Kaveh» hakerlik tobyna jáne onyń eki basshysyna qatysty tergeý bastady.
Degenmen Frantsııa bıligi Irannyń bul shabýyldarǵa qatysy baryn rastaıtyn dálelderdi jarııalaǵan joq. Al Tegeran Frantsııa Syrtqy ister mınıstriniń málimdemesine qatysty ázirshe jaýap bergen joq.
Buǵan deıin hakerler Eýropalyq odaqtyń jeti elindegi sýpermarketterdiń tońazytqysh júıelerine shabýyl jasaǵany habarlanǵan edi. Keıin Italııanyń bul iske arnaıy qyzmetterdi tartyp, tergeý bastaǵany belgili boldy.
Belgııa prokýratýrasy da kıbershabýylǵa baılanysty qylmystyq is qozǵady.
Sondaı-aq Frantsııada hakerler qan saqtaıtyn qoımalardaǵy temperatýrany 110 gradýsqa deıin kóterýge áreket jasaǵan. Budan bólek, Crédit Mutuel Arkéa frantsýz bankinde de iri kıbershabýyl anyqtalǵan edi.