Eýropanyń jetekshi elderi AQSh pen Iran arasyndaǵy kelisimge qatysty ún qatty
ASTANA. KAZINFORM – Frantsııa, Ulybrıtanııa, Italııa jáne Germanııa basshylary AQSh pen Iran arasyndaǵy kelisimge qol qoıý soǵystyń aıaqtalýyna bastaıtyn qadam dep esepteıdi. Alaıda olar Irannyń ıadrolyq qarýǵa ıe bolmaýy kerek ekenin eskertti. Bul týraly DW jazdy.
Germanııa, Frantsııa, Italııa jáne Ulybrıtanııa memleketteri men úkimetteri basshylary AQSh pen Iran arasynda 19 maýsymda qol qoıylady dep josparlanǵan beıbit kelisim týraly málimdemelerdi quptady. Bul oqıǵa «óńirlik turaqtylyqty qalpyna keltirýge jáne álemdik ekonomıkany turaqtandyrýǵa múmkindik beredi» delingen saıasatkerlerdiń 15 maýsym, dúısenbi kúni jarııalanǵan birlesken málimdemesinde.
Kóshbasshylar kelissózder úderisine qatysýshylardyń barlyǵyn dıplomatııalyq serpilispen quttyqtap, kelisimdi jedel ári jan-jaqty iske asyrýdyń mańyzyn atap ótti.
Sondaı-aq kelisim aıasynda Ormýz buǵazyndaǵy keme qatynasy shuǵyl túrde qalpyna keltirilýi tıis ekeni erekshe kórsetildi. Málimdemeden onyń avtorlary bul kúsh-jigerdi qoldaýǵa, sonyń ishinde álemdik otyn naryǵy úshin mańyzdy kólik dálizin mınadan tazartý jumystaryna qatysýǵa daıyn ekeni baıqalady.
Ormýz buǵazyndaǵy ahýal
Frantsııa prezıdenti Emmanıýel Makron men Ulybrıtanııa premer-mınıstri Kır Starmer AQSh pen Iran arasyndaǵy qujatqa qol qoıý josparyna qatysty jeke málimdemeler de jarııalady.
Kır Starmer óz málimdemesinde Ormýz buǵazyndaǵy keme qatynasynyń erkindigi eshqandaı tólemsiz qalpyna keltirilýge tıis ekenin aıtty. Ulybrıtanııa premeriniń aıtýynsha, bul búkil álem tap bolǵan AQSh pen Izraıldiń Iranǵa qarsy soǵysynyń ekonomıkalyq saldaryn jumsartýǵa múmkindik beredi.
Eýropaǵa keregi – ıadrolyq qarýsyz Iran
Emmanıýel Makron óz málimdemesinde Irannyń ıadrolyq jáne ballıstıkalyq baǵdarlamalary máselesine alańdaýshylyq bildirdi.
Starmer budan da qatań pikir aıtyp:
– Iran eshqashan ıadrolyq qarýǵa ıe bolmaýy tıis, – dedi.
Osy ustanym eýropalyq memleketter kóshbasshylarynyń ortaq málimdemesinde de bekitildi.
– Iran eshqandaı jaǵdaıda ıadrolyq qarýǵa qol jetkizbeýi kerek. Biz bul maqsatqa jetý úshin AQSh-pen, Iranmen jáne Halyqaralyq atom energııasy agenttigimen jumys isteýge daıynbyz. Iran óziniń ıadrolyq baǵdarlamasyna qatysty naqty ári tekserýge bolatyn qadamdar jasaǵan jaǵdaıda, tıisti sanktsııalardy alyp tastaýǵa ázirmiz, – dep málimdedi saıasatkerler.
Aıta keteıik, buǵan deıin AQSh pen Iran 19 maýsymda Shveıtsarııada beıbit kelisimge qol qoıatynyn jazdyq.
