Frantsııa Gazada ashtyq qaýpi tóngen jýrnalısterdi evakýatsııalaıdy

ASTANA. KAZINFORM — AFP (Agence France-Presse) frantsýz aqparat agenttiginiń basshylyǵy Gazada jumys isteıtin tilshilerin evakýatsııalaýǵa kiristi, dep habarlaıdy Anadolu. 

Evakýatsııa týraly sheshim Gazadaǵy ólimge ákelip jatqan qatty asharshylyqqa baılanysty qabyldandy.

— Jýrnalısterdiń ómirine qaýip tónip tur. Sondyqtan Izraıl bıliginen tilshiler men olardyń otbasylaryn dereý evakýatsııalaýǵa ruqsat berýin suraımyz. Biz Gazadaǵy qorqynyshty jaǵdaıǵa qatty alańdaımyz. Aılar boıy qyzmetkerlerimizdiń turmys jaǵdaıynyń kúrt nasharlaǵanyna kýá boldyq. Olardyń ónege bolarlyq batyldyǵy, kásibı adaldyǵy men tabandylyǵyna qaramastan, qazirgi jaǵdaıǵa shydaýǵa bolmaıdy, - deıdi agenttik basshylyǵy.

2024 jyldyń qańtary men sáýiri aralyǵynda AFP-tiń 8 qyzmetkeri jáne olardyń otbasylary Gazadan evakýatsııalandy. Agenttik bul jetistikti atap ótip, óz qyzmetkerlerine taǵy bir ret osyndaı jaǵdaı jasaıtynyn aıtqan.

— AFP 1944 jyldyń tamyzynda qurylǵannan beri kóptegen jýrnalıster túrli qaqtyǵystarda qaza tapty. Biz olardyń jaraqat alǵanyna, tipti túrmege jabylǵanyna da kýá boldyq. Biraq qyzmetkerlerdiń ashtan ólgen kezi esimizde joq, - delingen agenttiktiń H-tegi jazbasynda.

Committee to Protect Journalists-tiń (Jýrnalısterdi qorǵaý komıteti) statıstıkasyna sáıkes, soǵys bastalǵan 2023 jyldyń 7 qazanynan beri Gazada 186 jýrnalıst pen BAQ qyzmetkeri qaza tapqan. Onyń 176-sy palestınalyq, 2-i ızraıldik. Bul 2025 jyldyń 16 maýsymyndaǵy jaǵdaı boıynsha alynǵan derekter jáne qazir komıtet taǵy 130-dan astam jáıtti tekserip jatyr.

Eske sala keteıik, BUU Bas hatshysy Gaza sektoryndaǵy asharshylyq ár esikti «qaǵyp turǵanyn» aıtyp, dabyl qaqty.