Frantsııa Gaza sektorynan bosqyndardy qabyldaý baǵdarlamasyn ýaqytsha toqtatty

ASTANA. KAZINFORM – Frantsııa bıligi Gaza sektorynan palestınalyq mıgranttardy qabyldaý baǵdarlamasyn ýaqytsha toqtatty. Bul sheshim palestınalyq stýdenttiń antısemıttik kózqarastary qoǵamda rezonans týdyrǵannan keıin qabyldandy. Bul týraly DW basylymy habarlady.

Frantsııanyń Eýropa jáne syrtqy ister jónindegi mınıstri Jan-Noel Barronyń aıtýynsha, qazirgi ýaqytta eshqandaı evakýatsııa sharalary júrgizilmeıdi.

«Biz tergeý nátıjelerine saı tıisti qorytyndylar jasamaıynsha, eshbir evakýatsııa bolmaıdy. Buǵan deıin kelgen palestınalyqtar qosymsha tekserýden ótedi», – dedi mınıstr.

Onyń málimdeýinshe, elge kirgen stýdenttiń áleýmettik jelidegi antısemıttik jazbalary der kezinde anyqtalmaǵany ókinishti. Mınıstr bul stýdent Frantsııa aýmaǵynda bolmaýy tıis ekenin aıtty.

Frantsýz gazeti Le Monde-nyń derekterine sáıkes, 2023 jyldyń qazanynan beri Frantsııa Gaza sektorynan 500-ge jýyq adamdy evakýatsııalaǵan. Olardyń qatarynda balalar, jýrnalıster, stýdentter jáne óner ókilderi bolǵan.

Antısemıttik málimdemeler jasaǵan 25 jastaǵy palestınalyq stýdent Nýr A. – Lıll qalasyndaǵy Sciences Po joǵary oqý ornynyń stýdenti. Ol Frantsııa vızasyn Ierýsalımdegi frantsýz konsýldyǵynan alǵan. Alaıda, onyń áleýmettik jelidegi jarııalanymdary aldyn ala tekserilmegen. Jazbalarynda ol Adolf Gıtlerdiń sýretterin jarııalap, evreılerge qarsy ashyq shaqyrýlar jasaǵan.

2023 jyly Nýr A.-ǵa Frantsııa Mádenıet mınıstrligi tarapynan «Frankofonııa» syılyǵy tabystalǵan. Sonymen qatar, Sciences Po Lıll ınstıtýtynyń dırektory ony jeke páterinde qabyldaǵan.

Aıta keteıik, Frantsııa soty Bashar Asadty qamaýǵa alý orderin joıdy.