Frantsııa evtanazııaǵa resmı túrde ruqsat berdi
ASTANA. KAZINFORM – Frantsııada evtanazııa quqyǵy zańmen resmı túrde bekitildi. Birneshe jyl boıy talqylanǵan zańǵa el prezıdenti Emmanıýel Makron qol qoıdy, dep habarlaıdy Le Figaro.
Le Figaro málimetinshe, qujat 19 tamyzda Frantsııanyń resmı basylymynda jarııalandy. Zań birqatar talap saqtalǵan jaǵdaıda evtanazııaǵa ruqsat beredi.
Naýqas medıtsına qyzmetkeriniń qatysýymen ólimge ákeletin preparatty ózi qabyldaýy tıis. Eger densaýlyq jaǵdaıyna baılanysty muny óz betinshe jasaı almasa, preparatty medıtsına qyzmetkeri engize alady.
Bul quqyq Frantsııanyń kámeletke tolǵan azamattaryna jáne elde turaqty turýǵa yqtııarhaty bar adamdarǵa beriledi. Naýqas termınaldyq nemese údemeli satydaǵy aýyr ári emdelmeıtin dertke shaldyqqan, adam tózgisiz fızıkalyq azap shegip júrgen jáne sanaly túrde sheshim qabyldaýǵa qabiletti bolýy kerek.
Naýqasty bul rásimge jiberý týraly sheshimdi basqa mamandardy tarta otyryp, bir dáriger qabyldaıdy.
Ótken aptada Frantsııanyń Konstıtýtsııalyq keńesi zańnyń Konstıtýtsııaǵa sáıkestigin rastady. Osydan keıin Makron qabyldanǵan sheshimdi kópjyldyq demokratııalyq pikirtalastyń nátıjesi dep atady.
Qujattyń qabyldanýy frantsýz qoǵamynda túrli pikir týǵyzdy. Jerom Lejen qory zańǵa narazylyq bildirse, Les Éligibles et leurs aidants qaýymdastyǵy onyń qoǵamnyń eń osal toptaryna qaýip tóndirýi múmkin ekenin málimdedi.
Zań jobasy Frantsııada birneshe jyl boıy talqylandy. Buǵan deıin Makronnyń bastamasymen ómirden ótýge járdemdesý máselesi boıynsha azamattyq konvent ótkizilip, keıin qujat parlamentte uzaq talqylaýdan ótti.
Zańǵa keıbir dinı uıymdar men medıtsına qaýymdastyǵynyń ókilderi qarsy shyqqan.
Eske sala ketsek, buǵan deıin Frantsııanyń Konstıtýtsııalyq keńesi evtanazııaǵa qatysty zań jobasyn maquldaǵanyn jazdyq.
