Frantsııa elshiligi qazaq jaýyngerleriniń rýhyna qurmet kórsetti
ASTANA. KAZINFORM — Astanadaǵy Sharl de Goll eskertkishi aldynda Ekinshi dúnıejúzilik soǵysy jyldary Frantsııada partızan otrıadtarynyń quramynda shaıqasqan jaýyngerlerdiń rýhyna qurmet kórsetildi, dep habarlaıdy Qorǵanys mınıstrliginiń baspasóz qyzmeti.
Qurmet qaraýyl rotasynyń súıemeldeýimen eki eldiń tarıhı murasyna qurmet belgisi retinde Bas shtab bastyǵy — QR QK Qurlyq áskerleri bas qolbasshysynyń birinshi orynbasary general-maıor Qýanyshbek Úshtaev pen Frantsııanyń Qazaqstandaǵy elshisi Sılvıan Gıoge Frantsııa halqynyń táýelsizdigi men ulttyq birliginiń sımvolyna aınalǵan Sharl de Goll eskertkishine gúl shoqtaryn qoıdy.
— Soǵys jyldary mıllıondaǵan adam taǵdyry synǵa tústi. Otqa oranǵan maıdan dalasynda frantsýzdarmen birge jaýǵa qarsy jan alyp, jan berisken shaıqasta jeńiske jetýge partızandardyń qosqan úlesi zor boldy. Búgingi marapattaý rásimi tek ótkenge taǵzym ǵana emes, batyrlarymyzdyń erligin ulyqtaý. Jaýyngerlerimizdiń esimi urpaq jadynda máńgi saqtalady, — dedi general-maıor Qýanyshbek Úshtaev.
Qandy qyrǵynda 300-den astam otandasymyz Frantsııanyń Týlýza qalasy men onyń mańyn azat etýge belsene qatysqan.
Búgin sol jaýyngerlerdiń beseýi, ıaǵnı Ahmet Bektaev, Bektemir Baıjanov, Nuranbaı Baımuratov, Óteýálı Beısenǵalıev, Ahmet Sýbalovtyń balalary men nemerelerin Frantsııanyń Qazaqstandaǵy Tótenshe jáne Ókiletti elshisi Sılvıan Gıoge Frantsýz Respýblıkasynyń Qarýly kúshter jáne ardagerler mınıstri Katrın Votrenniń atynan 1939-1945 jylǵy Ekinshi dúnıejúzilik soǵysta Frantsııany azat etýge shaıqasqany úshin «Azat etý» medalimen marapattady.
— Úsh júzden astam qazaqstandyq Frantsııa jerinde frantsýzdarmen birge, qatarlasa, elimizdi azat etý jolynda shaıqasty. Osylaısha, olar óz Otanyna myńdaǵan shaqyrym jerde, ortaq jaýǵa qarsy birigip, qıyndyqtardy bastan keshirip, qan tógip, tipti jandaryn pıda etti. Kezinde general de Goll olarǵa qurmet kórsetti, al búgingi Frantsııa muny umytpaıdy, — delingen Frantsııa Qarýly kúshteri jáne ardagerler mınıstri Katrın Votrenniń sózinde.
Partızan jaýyngerlerdiń balalary men nemereleri erekshe tolqyp, alǵystaryn bildirdi. Urpaqtary bul Jeńistiń 81 jyldyǵynda erekshe syı bolǵanyn aıtady.
— Búgingi tolqynysymyz erekshe. Ákemizdiń erligi ulyqtalyp jatyr. Óte rızamyz, kózimizge jas kelip tur. Batyrlar rýhyna qurmet kórsetip jatqan Frantsııaǵa, elimizdiń Qorǵanys mınıstrligine alǵysymyz sheksiz, — dedi partızan jaýynger Bektemir Baıjanovtyń uly Syrlybaı Bektemirov.
Іs-shara sońynda marapattaý rásimine qatysqan ardagerler men qonaqtar estelik sýretke tústi.
Osyǵan deıin
