Frantsııa bir ǵasyr buryn óltirilgen koroldiń bas súıegin Madagaskarǵa qaıtardy
ASTANA. KAZINFORM — Frantsııa Madagaskarǵa úsh bas súıekti, onyń ishinde 1897 jyly frantsýz otarshyldary óltirgen korol Toeranyń bas súıegin qaıtardy, dep habarlady France 24.
Aral turǵyndary bul oqıǵany jıyrma jyldan astam kútken jáne bul Frantsııanyń 2023 jylǵy adam súıeginiń memlekettik kollektsııalarǵa qaıtarylýy týraly zańynyń alǵashqy praktıkalyq qoldanylýy boldy, dep atap ótti telearna.
France 24 telearnasynyń habarlaýynsha, korol Toera XIX ǵasyrdyń aıaǵynda frantsýz otarshyldyǵyna qarsy turǵan Madagaskardyń batys jaǵalaýyndaǵy sakalava etnıkalyq tobynyń jetekshileriniń biri bolǵan. Onyń kópshilik aldynda óltirilýi araldaǵy otarshyldyq zorlyq-zombylyqtyń sımvolyna aınaldy.
Bas súıek 128 jyl boıy Parıjdegi Adam murajaıynda otarshyldyq relıkti retinde saqtaldy. Koroldiń urpaqtary ony qaıtarý týraly 2003 jyly ótinish bildirdi. Máıitterdiń qaldyqtary Parıjdegi mádenıet mınıstrliginde mınıstr Rashıda Datı men Madagaskar mádenıet mınıstri Volamırantı Donna Mareniń qatysýymen ótken resmı rásimde Madagaskar úkimetiniń ókilderine tapsyryldy. Qaldyqtardy 31 tamyzda Madagaskarǵa jóneltiledi.
Telearna máıitterdiń qaıtarylýynyń Madagaskar úshin tereń sımvoldyq máni bar ekenin atap ótti. Bul Madagaskar prezıdenti Andreı Radjoelınanyń 2019 jylǵy saılaý aldyndaǵy ýádeleriniń biri bolǵan edi. Qaldyqtar 2024 jyldyń sáýir aıynda qaıtarylady dep kútilgen-tuǵyn, biraq patshanyń urpaqtary jergilikti dástúr boıynsha tańdalǵan jyl sátsiz dep sanalǵandyqtan, bul sheshimge qarsy boldy.
Eske sala keteıik, Frantsııada órt sóndirýshi tikushaq toǵanǵa qulady.