Frantsııa bıligi oqýshylardyń talabyna kóndi
ASTANA. KAZINFORM – Frantsııa úkimeti mektep oqýshylary men stýdentterdiń jappaı narazylyǵyna jaýap retinde bilim berý salasynda reformalar júrgizetinin jarııalady. Alaıda jastar uıymdarynyń ókilderi usynylǵan sharalardy jetkiliksiz dep sanap, halyqty 31 qazan men 5 qarashada sherýlerdi qaıta jalǵastyrýǵa shaqyryp otyr, dep habarlaıdy BBC.
Dúısenbi, 26 qazanda, joǵary synyp oqýshylary men stýdentter uıymdarynyń ókilderi Frantsııa premer-mınıstri Sebasten Lekornıýmen kezdesip, jaǵdaıdy retteý jónindegi úkimet usynystaryn talqylady.
Úkimettiń negizgi jeńildikteriniń biri – joǵary oqý oryndaryna túsýge arnalǵan Parcoursup onlaın platformasynan kezeń-kezeńimen bas tartý týraly sheshim. Joǵary synyp oqýshylary irikteý rásiminiń ashyq ári ádil emestigin birneshe ret synaǵan edi.
Kelesi jyly bılik platformanyń jumys isteý tetigin qaıta qarap, ony barynsha ashyq etýdi josparlap otyr. Al 2028 jylǵa qaraı qoldanystaǵy júıe tolyǵymen aýystyrylmaq.
Budan bólek, úkimet joǵary oqý oryndarynda qosymsha 15 myń oryn ashýǵa ýáde berdi. Orta mekteptiń joǵary synyptarynda oqýshylar sanyn 28 adammen shekteý josparlanyp otyr. Eskirgen mektep ǵımarattaryn jóndeýge tómen paıyzdyq mólsherlememen 4 mlrd eýro nesıe bólinedi.
Frantsııanyń bilim mınıstri Edýar Jeffre jarııalanǵan sharalar belgilengen merzimde júzege asyrylatynyna sendirdi.
Soǵan qaramastan, jastar uıymdarynyń ókilderi barlyq talap oryndalmaıynsha narazylyq aktsııalaryn toqtatpaıtynyn málimdedi.
Atap aıtqanda, Les Lycéens joǵary synyp oqýshylary uıymy tóraǵasynyń orynbasary Lýı Letýblon usynylǵan sharalar narazylyq qozǵalysyna qatysýshylar kótergen barlyq máseleni sheshpeıtinin atap ótti.
Frantsııada narazylyqtar qyrkúıek aıynda oqýshylardyń synyptardyń shamadan tys tolyp ketýine, muǵalimderdiń jetispeýine jáne oqý oryndarynyń jaǵdaıyna kóńili tolmaýyna baılanysty bastaldy.
Keıin sherýlerge ómir súrý quny men janarmaı baǵasynyń ósýine qarsy shyqqan kásipodaqtar men basqa da qoǵamdyq uıymdar qosyldy.
17 qazanda Parıjde jáne ózge qalalarda ótken jappaı aktsııalar polıtsııamen qaqtyǵystarǵa, órt qoıýǵa jáne dúkenderdi tonaýǵa ulasty.
Frantsııanyń ishki ister mınıstri Loran Nýnestiń málimetinshe, 24 qazanda el boıynsha ótken demonstratsııalar kezinde 1 435 adam ustalǵan.
Prezıdent Emmanıýel Makron jańa tártipsizdikter bolýy múmkin ekenin eskertip, kúsheıtilgen qaýipsizdik sharalary ázirge saqtalatynyn málimdedi.
Narazylyqtar aıasynda frantsýz bıznesi de shyǵynǵa ushyrap otyr. CCI France saýda-ónerkásip palatalary jelisiniń basshysy Alen Dı Kreshentsonyń aıtýynsha, 17 qazandaǵy tártipsizdikterden keıin kóptegen dúken jumysyn toqtatyp, sonyń saldarynan saýda kólemi azaıǵan.
Buǵan deıin Frantsııada 17 qazanda qymbatshylyqtyń saldarynan turmystyq taýqymettiń artyp, memlekettik shyǵyndardyń qysqarýyna qarsy jappaı narazylyq aktsııalary ótken. Іshki ister mınıstrliginiń baǵalaýynsha, el boıynsha sherýlerge shamamen 550 myń adam, onyń ishinde Parıjde 110 myńǵa jýyq adam qatysqan. Narazylyq bildirýshiler halyqtyń satyp alý qabiletin arttyrýdy jáne memlekettik qyzmetterdiń jumysyn jaqsartýdy talap etti.
