Frantsııa balalarǵa áleýmettik jelige kirýge tyıym salmaqshy
ASTANA.KAZINFORM - Frantsııa Parlamentiniń Tómengi Palatasy 15 jasqa tolmaǵan balalarǵa áleýmettik jelilerge kirýge tyıym salatyn zań jobasyn (130-ǵa qarsy 21 daýyspen) maquldady. Zań jobasy jasóspirimderdiń mektep aýmaǵynda uıaly telefondardy paıdalanýyna da tyıym salady.
Zań jobasy balalarǵa onlaın áleýmettik jeli qyzmetine kirýge tyıym salady. Keıbir bilim berý platformalary bosatylǵan. WhatsApp sııaqty «jeke messendjerlerge» de ruqsat.
Bul shara jasóspirimderdiń densaýlyǵyn qorǵaýǵa baǵyttalǵan jáne úkimet pen prezıdent Emmanıýel Makronnyń belsendi qoldaýyna ıe boldy. Zań jobasyn endi Parlamenttiń Joǵarǵy Palatasy qaraýy kerek. Ol sandyq tehnologııalar mınıstri Ann Le Enanff ýáde etkendeı, «aldaǵy aptalarda» ótedi.
Makronnyń ótinishi boıynsha úkimet zań jobasyn qaraýdyń jedeldetilgen rásimin bastady. Bul parlamenttiń ár palatasynda eki oqylymnyń ornyna bir ǵana oqylymdy talap etedi. Frantsııa kóshbasshysy ony «mańyzdy qadam» dep atady.
- Frantsýz halqynyń basym kópshiligi muny talap etedi. Úkimetpen jemisti jumys istegennen keıin Ulttyq Assambleıa jańa ǵana maquldady. Bul úlken qadam, - dep jazdy Makron óziniń X áleýmettik jelidegi paraqshasynda.
France 24 arnasynyń habarlaýynsha, úkimet 2026 oqý jylynyń basynan bastap jańa akkaýnttar ashýǵa tyıym salýdy jáne 2027 jyldyń 1 qańtaryna deıin barlyq paıdalanýshylar úshin (qoldanystaǵy akkaýnttardy qosa alǵanda) jasyn tekserýdi engizý arqyly tez arada áreket etýdi josparlap otyr.
Eger zań qabyldansa, Frantsııa jeltoqsannyń basynda 16 jasqa tolmaǵandarǵa áleýmettik jelilerdi paıdalanýǵa tyıym salǵan, Aýstralııadan keıin kámeletke tolmaǵandarǵa qatysty osyndaı shekteý sharalaryn qabyldaǵan ekinshi el bolady.
Sonymen qatar, zań jobasynyń taǵy bir babynda 2018 jyly engizilgen kolledjderde - 11-15 jastaǵy balalarǵa arnalǵan orta mektepterde - uıaly telefondy paıdalanýǵa tyıym salýdy keńeıtý usynylady. Endi bul tyıymdy orta mektepterge de taratý josparlanǵan.
Aıta keteıik, Aýstralııa ótken jyldyń sońynda balalarǵa áleýmettik jelilerdi paıdalanýǵa tyıym salǵan álemdegi alǵashqy el boldy.