Frantsııa balalar arasyndaǵy «Evrovıdenıede» jeńiske jetti

Frantsııanyń Nıtstsa qalasynda balalar arasyndaǵy «Evrovıdenıe» halyqaralyq baıqaýynyń fınaly ótti. Kazinform bul týraly Euronews-ke silteme jasap habarlaıdy.

Nátıjesinde Frantsııa ekinshi jyl qatarynan jeńiske jetti. Ekinshi oryn Armenııanyń, úshinshi oryn Ispanııanyń jas ánshilerine buıyrdy.

13 jastaǵy Zoııa Klozıýr Frantsııada aıtarlyqtaı tanymal ánshi. Ol mekteptegi býllıngke qatysty Cœur («Júrek») pop-kompozıtsııasyn oryndady. «Bul – óte ózekti taqyryp jáne ol men úshin óte mańyzdy. Sebebi tómen synyptarda men munymen betpe-bet kelgenmin», - dedi jas ánshi frantsýz BAQ-taryna.

Aıta keteıik, bul Frantsııanyń Junior Eurovision baıqaýynda ekinshi jyl qatarynan jáne tórt jylda úshinshi ret jetip otyrǵan jeńisi.