Frantsııa, Ázerbaıjan, Belarýs jáne basqa elderdiń basshylary Toqaevqa kóńil aıtty
ASTANA. KAZINFORM — Qasym-Jomart Toqaevtyń atyna Kaspıı teńizindegi oqý-jattyǵý jıyny barysynda áskerı qyzmetshilerdiń qaza tabýyna baılanysty shet memleketterdiń basshylary men halyqaralyq uıymdardyń jetekshilerinen kóńil aıtý jedelhattary kelip túsip jatyr.
Jedelhattarda shetel kóshbasshylary osynaý qıyn sátte Qazaqstan halqymen birge ekenin jetkizgen.
Sonymen qatar qazaqstandyqtardyń aýyr qaıǵysyna ortaqtasyp, qaza tapqan azamattardyń týǵan-týystaryna kóńil aıtady.
Kóńil aıtý jedelhattaryn Tájikstan Prezıdenti Emomalı Rahmon, Ázerbaıjan Prezıdenti Ilham Álıev, Belarýs Prezıdenti Aleksandr Lýkashenko, Frantsııa Prezıdenti Emmanıýel Makron, Serbııa Prezıdenti Aleksandr Výchıch, Vetnam Kommýnıstik partııasy Ortalyq komıtetiniń Bas hatshysy, Vetnam Sotsıalıstik Respýblıkasynyń Prezıdenti To Lam, Armenııa Premer-mınıstri Nıkol Pashınıan, Tatarstan Raısy Rýstam Mınnıhanov, sondaı-aq birqatar halyqaralyq uıymnyń jetekshileri joldady.
Qazaqstan Prezıdenti halyqaralyq qoǵamdastyqtyń jubanysh sózi men qoldaýyna rızashylyǵyn bildirdi.
Eske salaıyq, 2026 jylǵy 24 qyrkúıekte Kaspııdegi áskerı oqý-jattyǵý kezinde 9 áskerı qyzmetshi qaza tapqanyn habarlaǵanbyz. Úsh áskerı qyzmetshi qutqaryldy. Olardyń bireýi aýrýhanaǵa jatqyzyldy.
Keıinnen Kaspııde qaza bolǵan áskerı qyzmetshilerdiń sany 12-ge jetip, ekeýi izdestirilip jatqany habarlandy.
Qorǵanys mınıstrligi oqý-jattyǵý kezinde qaza tapqan áskerı qyzmetshilerdiń tizimin jarııalady.
Áskerı qyzmetshilerdiń qaza bolý faktisi boıynsha qylmystyq is qozǵalyp, tergelip jatqanyn jazdyq.
Sonymen qatar, Prezıdent Qasym-Jomart Toqaev Mańǵystaý oblysynda áskerı oqý-jattyǵý kezindegi qaıǵyly oqıǵa saldarynan qaza tapqan áskerı qyzmetshilerdiń týǵan-týystaryna kóńil aıtty.
Áskerılerdiń qazasynan keıin Aqtaýda úsh kúnge josparlanǵan merekelik sharalar ótpeıtini aıtyldy.
Búgin Kaspııde eki áskerı qyzmetshini izdeý operatsııasyna júzdegen adam jumyldyrylǵany habarlandy.
Sonymen qatar áskerı qyzmetshilerdiń qaýipsizdigine jaýapty tulǵalar kúdikke ilingeni týraly jazǵan edik.
Aıta ketelik Kaspııdegi tótenshe jaǵdaıdan keıin qutqarylǵan áskerı qyzmetshi esin jıǵan edi.
Búgin Kaspıı teńizinde joǵalǵan eki áskerı qyzmetshiniń denesi tabylyp, izdestirý operatsııasy aıaqtalǵan edi.
Sonymen qatyr Kaspııdegi áskerı qyzmetshilerdiń qazasyna baılanysty qylmystyq is eki bap boıynsha tergelip jatyr.
Qyzmetke salǵyrt qaraý jáne korabl júrgizý qaǵıdalaryn buzý boıynsha aýyr zardaptarǵa ákep soqqan qylmystyq quqyq buzýshylyqtar jasady degen kúdikpen Qazaqstan Respýblıkasy Qarýly Kúshteriniń joǵary jáne aǵa komandalyq quramyndaǵy jaýapty laýazymdy tulǵalar ustaldy.
Qorǵanys mınıstri, avıatsııa general-leıtenanty Dáýren Qosanov kináli tulǵalar jaýapkershilikten jaltarmaıtynyn aıtty.
