Fransýa Olland Qazaqstan Prezıdentine joldaǵan xatynda 25 jyl buryn bolǵan keshki asty eske aldy
ASTANA. QazAqparat - Frantsııa prezıdenti Fransýa Olland eki eldiń dıplomatııalyq qarym-qatynastarynyń ornaǵanyna 25 jyl tolýyna oraı QR Prezıdenti Nursultan Nazarbaevqa quttyqtaý xat joldady. Búgin Astanada ótken baspasóz máslıxatynda ony Frantsııanyń Qazaqstandaǵy elshisi Fransıs Eten oqyp berdi, dep xabarlaıdy QazAqparat tilshisi.
«Frantsııa men Qazaqstannyń arasyndaǵy dıplomatııalyq qarym-qatynastardyń 25 jyldyǵyna oraı quttyqtap joldaǵan xatyńyzǵa zor alǵysymdy bildiremin. Óz kezegimde Frantsııanyń Qazaqstanmen aradaǵy baılanystardy udaıy nyǵaıtýǵa orasan mán beretinin jetkizýge ruqsat etińiz.
25 jyl buryn, 1992 jyly 23 qyrkúıekte Elıseı saraıynda Siz Fransýa Mıtteranmen kezdesken edińiz. Sizdiń mártebeńizge oraı uıymdastyrylǵan keshki as ústinde bizdiń áriptestigimizdi barlyq salalar boıynsha damytýǵa degen Frantsııanyń qalaýyn Fransýa Mıtteran atap ótken bolatyn.
Búginde bizdi osy jolda ilgeri basyp kele jatqanymyzdy erekshe atap ótýge bolady. 2015 jyly 5 qarashada Parıjde kezdesken kezde men Qazaqstan ekonomıkasynyń beriktigine senim bildirip, ortaq jobalarymyzdy naqtylaýdaǵy kedergiler joıylsa eken degen tilegimdi bildirgen edim.
Meniń senimdiligim ózgergen joq, kez kelgen jaǵdaıda Frantsııa franko-qazaqstandyq áriptestiktiń turaqtylyǵy men tıimdiligi jolynda jumys jasaıtyn bolady. Soǵan senimdi bola alasyz», - dep jazdy Olland óz xatynda.
Frantsııanyń Qazaqstandaǵy elshisi Fransıs Etenniń aıtýynsha, eki el arasyndaǵy dıplomatııalyq qarym-qatynastardyń 25 jyldyǵyna oraı túrli merekelik sharalardy ótkizý josparlanǵan. Osy dataǵa arnalǵan logotıp ázirlenip, poshta markasy shyǵarylatyn bolady.
