Fransýa Fııon saılaýǵa qatysýdan bas tartpaıtynyn jarııa etti
ASTANA. QazAqparat - Frantsııa prezıdentine úmitker Fransýa Fııon sońǵy janjalǵa qaramastan saılaýǵa qatysýdan bas tartpaıtynyn jarııa etti. Onyń aıtýynsha, mańyzdy sharaǵa 50 kún qalǵanda keri sheshim qabyldaý saıası daǵdarys týdyrýy múmkin, dep jazady «Habar 24».
Aıta ketken jón, burǵynǵy premer-mınıstr tóńiregindegi daý qańtarda shyqqan bolatyn. Ol kezde jergilikti basylymdardyń biri maqala jarııa etken edi. Onda saıasatker Ulttyq assambleıa depýtaty bolǵanda, áıelin kómekshisi retinde qyzmetke alǵany týraly jazylǵan.
Alaıda shyn mánisinde, onyń jary jumys istemeı, 8 jyl boıy joǵary jalaqy alyp kelgen degen kúdik bar. Sonymen qosa, Frantsııa prezıdentine úmitker uly men qyzyna qatysty da osyndaı aılaǵa barǵan bolýy múmkin.
24 aqpanda qarjy prokýratýrasy bul máselege qatysty tergeý bastaǵan. Al júrgizilgen saýalnama nátıjesi kórsetkendeı, halyqtyń 70 paıyzdan astamy Fııon myrzanyń bıyl kóktemde ótetin prezıdenttik saılaýǵa qatysqanyn qalamaıdy eken.
