Fransıs Pýlenktiń «Adam daýysy» atty monooperasy qazaq tilinde sahnalanady

ASTANA. KAZINFORM — 20 aqpan kúni Jambyl atyndaǵy Qazaq memlekettik akademııalyq fılarmonııasynyń Úlken zalynda frantsýz kompozıtory Fransıs Pýlenktiń «Adam daýysy» atty monooperasy qoıylady, dep habarlaıdy Mádenıet jáne aqparat mınıstrliginiń baspasóz qyzmeti.

Jan Koktonyń pesasy negizinde jazylǵan bul lırıkalyq týyndy psıhologııalyq ıirimderge toly HH ǵasyrdaǵy opera óneriniń jaýhary sanalady. Bir ǵana keıipkerdiń taǵdyry men ishki arpalysyna qurylǵan bul qoıylym kórermenge jalǵyzdyq, mahabbat jáne qoshtasý sezimderin tereńinen sezinýge múmkindik beredi.

Sahnadaǵy dramalyq obrazdy Qazaqstannyń eńbek sińirgen qaıratkeri Dárııa Júsip somdaıdy. Qoıylymda ol kórermenge akterlik oıynymen qatar vokaldyq sheberligin de pash etedi.

Operany Qanat Omarovtyń dırıjerligimen T.Ábdirashev atyndaǵy QR Memlekettik akademııalyq sımfonııalyq orkestri súıemeldeıdi.

— Qoıylymnyń qazaq tilinde sahnalanýy — otandyq óner úshin mańyzdy qadam. Sebebi kórermen qaýymǵa klassıkalyq týyndyny ana tilinde tyńdap, túsinýge múmkindik beredi, — dep atap ótti mınıstrlik.

Budan buryn «Astana Operada» eston mýzykasynyń kontserti ótkeni habarlandy.