Frankofonııa kóktemi-2023 mádenı is-sharalar maýsymy bastaldy

ASTANA. QazAqparat – Búgin Qazaqstanda «Frankofonııa kóktemi-2023» mádenı is-sharalar maýsymy bastaldy. Halyqaralyq frankofonııa kúniniń maqsaty – frantsýz tilinde sóıleıtin adamdardy biriktirý, onyń taralý aıasyn keńeıtý jáne frantsýz mádenıetin nasıhattaý, dep habarlaıdy QazAqparat tilshisi.

Bıyl Qazaqstandaǵy «Frankofonııa kóktemin» 9 elshilik uıymdastyrady. Atap aıtqanda, 1 naýryz ben 30 sáýir aralyǵynda Armenııa, Belgııa, Mysyr, Kanada, Lıvan, Marokko, Rýmynııa, Frantsııa jáne Shveıtsarııanyń Qazaqstandaǵy elshilikteri Frantsýz alıanstarymen jáne basqa da qazaqstandyq frankofon uıymdarmen seriktestikte frantsýz tili men mádenıetiniń festıvalin ótkizedi. Onyń barysynda 2 aı boıy mádenı sharalar uıymdastyrylady.

«Frankofonııa kóktemi» – dástúrli shara jáne frankofon mádenıetiniń festıvali. Búginde álemde 320 mıllıonnan astam adam frantsýz tilinde sóıleıdi. Frantsýz tili – álemdegi 29 eldiń resmı tili. Ol dúnıejúzinde taralýy jaǵynan besinshi jáne ınternette qoldaný deńgeıi boıynsha tórtinshi orynda. Bul festıvaldiń maqsaty – frantsýz tiliniń baılyǵyn, sondaı-aq frankofon elderi mádenıetiniń ereksheligin atap ótý», - dedi Frantsııanyń Qazaqstandaǵy Tótenshe jáne Ókiletti Elshisi Dıde Kaness OKQ ótken brıfınginde.

Elshiniń sózinshe, «Frankofonııa kóktemi» aıasyndaǵy is-sharalar Astana, Almaty, Shymkent, Qaraǵandy, Atyraý, Qostanaı jáne Óskemende ótedi.

«Frankofonııa aptalyǵy aıasynda 19 frantsýz fılmi usynylady. Sonymen qatar, 7 naýryzda Almatyda «Áıelderdiń sporttaǵy orny» taqyrybynda fılmi kórsetiledi. Sondaı-aq, osy kórsetilimnen keıin áıelder quqyqtary týraly pikirtalas bolady», - dep málim etti Dıde Kaness.

Aıta keteıik, «Frankofonııa kóktemi» Qazaqstanda 13 jyldan astam ýaqyt boıy ótkizilip keledi.