Frantsýzdar Túrkistanda ınvestıtsııalyq jobalardy iske asyrýǵa nıetti
TÚRKІSTAN. QazAqparat - Túrkistan oblysy ákiminiń orynbasary Erbol Tasjúrekov Frantsııanyń Almaty qalasyndaǵy Bas konsýly Aleksıs Shahtahtınskıımen kezdesti, dep habarlaıdy QazAqparat.
Oblys basshysynyń baspasóz qyzmetinen málim etkendeı, taraptar eki el arasyndaǵy saýda-ekonomıkalyq baılanys pen ınvestıtsııalyq yntamaqtastyqty arttyrý jaıyn talqylady.
Kezdesýde oblys ákiminiń orynbasary qonaqtardy óńirdiń ekonomıkalyq áleýetimen tanystyryp, birlesken jobalardy júzege asyrýǵa shaqyrdy.
«Oblysta ınvestıtsııalyq jobalardy júzege asyrýǵa, shaǵyn jáne orta kásipkerlikti damytýǵa meılinshe jaǵdaı jasalǵan. Sondaı-aq 2 mln turǵyny bar Túrkistan óńiri Qazaqstandaǵy halqy eń tyǵyz ornalasqan oblysqa jatady. Mundaǵy aýyl sharýashylyǵy salasy aımaqtyq ekonomıkanyń draıverine aınalǵan dep aıtýǵa bolady. Atap aıtsaq, jylyna 1 mln tonna baqsha ónimderi jınalady. Respýblıkadaǵy jylyjaılardyń 90 paıyz úlesi bizdiń oblysqa tıesili. Eldegi maqtanyń 100 paıyzy bizde ósiriledi. Odan bólek, týrızm salasyn damytýǵa mol múmkindikter bar. Mine, osy baǵyttar boıynsha ortaq jobalardy iske asyrýǵa shaqyramyz», - dedi E.Tasjúrekov.
Óz kezeginde Aleksıs Shahtahtınskıı aıtylǵan usynystardy qabyl alyp, aldaǵy ýaqytta birqatar ınvestıtsııalyq jobalardy júzege asyrý baǵytynda tıisti jumystar atqarylatynyn jetkizdi.
Aıta keteıik, Qazaqstan men Frantsııa arasyndaǵy dıplomatııalyq qarym - qatynas eń alǵash 1992 jyly ornaǵan. Nátıjesinde qos elde elshilikter ashylyp, ekonomıkalyq baılanys nyǵaıa tústi. Ótken jyldyń qorytyndysy boıynsha, elder arasyndaǵy taýar aınalym 3,11 mlrd AQSh dollaryn quraǵan.
