Frantsýzdar Shymkenttegi túrmeniń qabyrǵasyna qyzǵaldaq sýretin saldy
ShYMKENT. QazAqparat - Frantsııa eliniń graffısteri Shymkenttegi túzeý mekemesiniń qabyrǵalaryna qyzǵaldaqtardyń sýreti salyp jatyr. Bul shara Qazaqstan men Frantsııa elderiniń dıplomatııalyq qarym-qatynasynyń 25 jyldyǵy men Sharl de Goldiń Qazaqstanǵa kelgenine 50 jyl tolýyna oraı uıymdastyryldy, dep habarlaıdy QazAqparat tilshisi.
Parıjdiń úsh sýretshisi Qazaqstannyń úshinshi megapolısine 10-shy qarasha kúni ashylatyn Frantsýz alıansynyń arnaıy shaqyrýymen keldi. Frantsııalyq graffıst Lorellanyń sózinshe, ózgeshe uıymdastyrylǵan shara Qazaqstan men Frantsııa elderiniń dostastyǵyn nyǵaıtý maqsatynda qolǵa alynyp otyr. Sondaı-aq, qylqalam sheberi túzeý mekemesiniń qabyrǵalarynda bostandyq belgisi sanalatyn qyz ben Shymkenttiń logotıpi qyzǵaldaqty jáne shym shaharǵa ushyp kelgen ushaq beınelenetinin aıtady. Al, sýret salý jumystaryn bes kún ishinde aıaqtaýdy josparlap otyr eken. 
«Negizgi ıdeıany jergilikti sýretshilermen birlese otyryp jasadyq. Biz bul mekemeni kezdeısoq tańdaǵan joqpyz. Túrme tas joldyń boıynda ornalasqan ári qabyrǵalary da áppaq. Ol jerge kelý de ońaı. Sonymen qatar qala turǵyndary sýretterimizdi ońaı kóre alady»,- deıdi Lorella.
