Frantsýzdar «Qyz Jibek» fılminen qazaqtyń kim ekenin bildi - xalyq ártisi Áshimov
ASTANA. QazAqparat - Úkimettiń búgingi otyrysynda otandyq kınoındýstrııany damytý máselesi qaraldy. Otyrys barysynda sóz alǵan xalyq ártisi Asanáli Áshimov ulttyq kınonyń yqpalyn, onyń qazaqty ózge elderge tanytýdyń quraly ekenin jetkizip, «Qyz Jibek» fılmin mysal retinde keltirdi, dep xabarlaıdy QazAqparat tilshisi.
«Osydan 40 jyl buryn Frantsııada «Qyz Jibektiń» frantsýz tilindegi nusqasynyń premerasy boldy. Úsh saǵat otyrdyq. Sonda birde-bir adam zaldan shyqqan joq. Bári basynan aıaǵyna deıin qarap shyqty. Olardy batyrlyq epos, lıroepos degen bolmaıdy eken. Fılmniń sońynda bir úlken professor shyǵyp, qazaqtyń tarıxyn azdap aıtty. Kóptegen suraqtar qoıyldy. Kıim-keshek týraly, úrdis, tártip týraly... Sonda suraǵany, fılmdegi kıimdi qazaqtyń qyzdary kıip júre me? Joq, endi bul tarıxı fılmder, osylaı túsiriledi dedik. Sonda aıtqandary, áttegen-aı kııýge bolatyn kıimder ǵoı, qyzdarǵa qandaı jarasady. Qaı ǵasyrdaǵy kıimder ekenin surady. Men aıttym, bul 15-16-shi ǵasyrlar. Sol ǵasyrda qazaqtyń mádenıeti mynadaı bolsa, qazir qandaı dárejege óskeni belgili dep bizge baǵa bergen. Rıza bolyp qaıttyq. Mine, kınonyń mańyzdylyǵyn osydan-aq túsinýge bolady. Sondyqtan kınoónerden eshteńe aıamaý qajet», - dedi Áshimov.
Aıta keteıik, otyrys barysynda Mádenıet jáne sport mınıstri Arystanbek Muxamedıuly otandyq kınoındýstrııany damytý máseleleri boıynsha baıandama jasady.
Al Úkimet basshysy Baqytjan Saǵyntaevtyń oıynsha, otandyq kınoındýstrııa salasyna bıznesti kóptep tartyp, monoqalalar men shaǵyn qalalarda kınoteatrlardy kóptep ashý qajet.
