Frantsýz jýrnaly Fransýa Ollandty áıeliniń kózine shóp saldy dep aıyptaýda
ASTANA. 10 qańtar. QazAqparat - Frantsýzdyq Closer jýrnaly el prezıdenti Fransýa Ollandty óziniń azamattyq nekedegi áıeliniń kózine shóp saldy dep aıyptap otyr. Redaktsııa óziniń 10 qańtarda shyǵatyn baspa nusqasynda memleket basshysynyń belgili aktrısa Jıýlı Gaıemen (Julie Gayet) qarym-qatynasyn dáleldeıtin sýretterdi basatynyn málimdegen.
Bul týraly frantsýzdiq BAQ-qa silteme jasap, lenta.ru habarlap otyr.
Basylymnyń málimetterinshe, Frantsııa prezıdenti skýtermen búkil Parıjdi basyp ótip, kóńildesi turatyn úıge jıi barady eken. Tipti ol sol úıde túneýge de qalatyn kórinedi. Osyndaı sapary kezinde prezıdentti tek bir ǵana oqqaǵar kúzetetin bolyp shyqty. Bul onyń ómirine qaýip tóndiretini daýsyz.
Fransýa Olland bolsa, Agence France-Presse-ke habarlaǵandaı, Closer jýrnalyn sotqa bermek nıette eken. Memleket basshysynyń oıynsha, mundaı materıaldardy jarııalaý onyń jeke ómirine qol suǵýshylyq bolyp tabylady.
Qazir 41 jastaǵy Jıýlı Gaıe Frantsııada 50-den astam fılmge túsken tanymal aktrısa.
Aıta ketý kerek, resmı túrde Frantsııanyń birinshi hanymy 49 jastaǵy jýrnalıst áıel Valerı Trıerveıler bolyp sanalady. Ol ekeýiniń kóńilderi F. Olland prezıdent bolǵannan birneshe jyl buryn qosylǵan bolatyn. Buǵan deıin qazirgi prezıdent Segolen Rýaıal esimdi 4 balasynyń anasymen 25 jyldaı azamattyq nekede turǵan.
Agence France-Presse-tiń atap ótýinshe, Frantsııanyń kóptegen prezıdentteriniń óz kezinde kóńildesteri bolǵan. Solardyń qatarynda Jak Shırak, Fransýa Mıtteran jáne Valerı Jıskar d'Estender bar. Degenmen, frantsýzdar basshylarynyń mundaı «erkelikterine» árdaıym salqynqandylyqpen qarap kelgen. Olardyń kóńildesteriniń bolýy saıası arenadaǵy reıtıngterine esh áser etpegen.
