Frantsýz velosıpedshisi 105 jasynda rekord ornatty
ASTANA. QazAqparat - Frantsýz Rober Marshan 1 saǵatta frantsýz ulttyq velodromynan 22,5 shaqyrym júrip ótip, óziniń jas sanatynda rekord ornatty. Endi Marshan - 105 jastan asqan velosıpedshiler arasynda chempıon. «100-105» aralyǵyndaǵy chempıondyq ataq ta 2012 jyldan beri osy Marshanǵa tıesili edi.
«Men munda chempıon bolý úshin emes, 105 jastaǵy adamnyń da velosıped tebe alatynyn dádeldeý úshin keldim», - dep málimdedi Marshan.
Velosıpedshi ózin jaqsy sezinýde, dep jazdy Bı-Bı-Sı .
«Aıaǵym aýyryp turǵan joq. Tek qolym azdap aýyrady, onda da revmatızmnen», - dep suhbat berdi sportshy jýrnalısterge.
2012 jyly Marshan saǵatyna 26,9 shaqyrym júrip,100 jastan asqan sportshylar sanatynda chempıon atanǵan edi.
«Men burynǵy qalpymda emespin», - dep qynjyldy ol.
Óz jasynda mundaı fızıkalyq formada júrýdiń syry nede degen suraqqa Marshan durys dıetada dep jaýap berdi.
Ol jemis-jıdek pen kókónisterdi, etti kóbirek jeýge jáne múldem kofe ishpeýge keńes berdi. Marshannyń ózi kúnine bir saǵatyn velojattyǵý qurylyǵysyna arnaıdy.
Marshan 1911 jyly týǵan. Ekinshi dúnıejúzilik soǵys kezinde ol ultshyldarǵa tutqynǵa túsken. Soǵys bitken soń, Venesýelanyń qant quraǵy plantatsııalarynda, Kanadada otynshy bolyp jumys isteıdi.
Sportshy retinde Marshan óz eliniń atynan túrli halyqaralyq gımnastıkalyq jarystarǵa barǵan jáne bokspen shuǵyldanǵan.
