Frantsýz kompanııalaryna Nur-Sultannyń ınvestıtsııalyq tartymdylyǵy tanystyryldy
NUR-SULTAN. QazAqparat – Ekonomıkalyq dıplomatııany ilgeriletý aıasynda Qazaqstannyń Frantsııadaǵy Elshiligi frantsýz ınvestorlaryna elimizdiń aımaqtarynyń prezentatsııalary toptamasyn ótkizý bastamasyn kóterdi, dep habarlaıdy QR SІM baspasóz qyzmeti.
Beınekonferentsııa formatyndaǵy alǵashqy osyndaı kezdesý Nur-Sultan qalasynyń ákimdigi men MEDEF qaýymdastyǵyna múshe – frantsýz kompanııalary arasynda ótti.
Onlaın is-shara Qazaqstan-Frantsııa iskerı keńesiniń teń tóraǵalary Aıdan Káribjanov pen Iv-Lýı Darrıkarrerdiń, Qazaqstan Elshisi Jan Ǵalıevtiń, Nur-Sultan qalasy ákiminiń orynbasary Malıka Bekturovanyń, sondaı-aq «Astana Invest» jáne «Astana Innovations» kompanııalary ókilderiniń qatysýymen ótti.
Óz baıandamasynda M. Bekturova qalalyq ınfraqurylymnyń jaǵdaıy men bolashaǵy, sondaı-aq sheteldik ınvestorlarmen jáne seriktestermen ózara árekettesý mehanızmderi týraly egjeı-tegjeıli aqparat berdi.
Frantsýz kompanııalarynyń ókilderi ózderin qyzyqtyrǵan birqatar suraqtar qoıyp, tolyqqandy jaýaptar ala aldy. Atap aıtqanda, olardy ınfraqurylym men kólikti damytý, ekologııany jaqsartý jáne qorshaǵan ortany qorǵaý, sondaı-aq tsıfrlandyrý jobalaryna qatysý múmkindikteri qyzyqtyrdy. Frantsýz seriktester usynylǵan aqparattyń joǵary sapasy men ózektiligin atap ótti. Kezdesýge qatysýshylar birlesken jobalar boıynsha júzbe-júz talqylaý ótkizý úshin sanıtarlyq kedergilerdiń tezirek alynatynyna úmit bildirdi.
