Frantsýz fotografy qazaqstandyq erekshe balalardy fotoónerge baýlydy
NUR-SULTAN. QazAqparat - Nazarbaev ortalyǵynda «Jańa kózqaras» degen atpen sal aýyrýyna shaldyqqan balalar túsirgen sýretterdiń kórmesi ótti, dep habarlaıdy QazAqparat tilshisi.
QR Tuńǵysh Prezıdenti qorynyń qoldaýymen úshinshi jyl qatarynan uıymdastyrylyp jatqan sharanyń basty qonaǵy - frantsýz fotografy Erık Vazzoler. Tanymal fotosýretshi 6 apta boıy Shymkent, Temirtaý qalasynan jınalǵan 60 balaǵa foto óneriniń qyr-syryn úıretken.
«Qolyma fotoapparat alǵanyma 30 jyl bolypty. Dál osyndaı úıirmeni Frantsııa, Germanııa, Polsha elderinde uıymdastyrdyq. Al Qazaqstan bıyl úshinshi ret múmkindik berdi. Nazarbaev ortalyǵy sııaqty keremet orynda kórmesin ótkizý balalar túgil kásipqoı fotosýretshiler úshin arman. Barlyq álem bóbekteri sııaqty qazaqstandyq búldirshinderdiń de qorshaǵan ortany tanýǵa degen qulshynysy erekshe. Internetttiń ıirimi arbaǵan jańa dáýirde balalardyń qorshaǵan ortaǵa kózin ashyp qaraýy óte mańyzdy. Meniń osy sharaǵa bar qulshynyspen kirisýimniń basty sebebi de osy» - deıdi Erık Vazzoler.
Kórmege 20 balanyń 45-ten astam sýreti qoıyldy. Ózi túsirgen sýrettiń Nur-Sultan qalasynyń tórinde qoıylatynyn estigen temirtaýlyq Anastasııa Kravtsova sharaǵa arnaıy kelipti.
«Mundaı sharanyń balalarmen qatar ata-analarǵa da bereri kóp. Qyzym úıirmeden shabyttanyp qaıtty. Tuńǵysh Prezıdent qory ár balaǵa fotoapparat syılady. Qyzymnyń qolynan fotoapparat túspeıtin bolyp aldy. Erık ustazy sııaqty kásipqoı maman bolǵysy kelip júr» - deıdi anasy Lıýdmıla Kravtsova.
Kórmeniń ashylýyna Frantsııa elshiliginiń mádenıet boıynsha Attashesi Andre Belver qatysyp, jas fotograftardy alǵashqy kórmelerimen quttyqtady.
