Frantsýz bıznesi Qazaqstanda ózin jaqsy sezingenin qalaımyz -Saǵyntaev
ASTANA. QazAqparat - Frantsýz bıznesi Qazaqstanda ózin barynsha jaqsy sezingenin qalaımyz. Bul týraly búgin Frantsııa-Qazaqstan saýda-ónerkásip palatasy uıymdastyrǵan dóńgelek ústel barysynd QR Premer-Mınıstri Baqytjan Saǵyntaev aıtty, dep habarlaıdy QazAqparat.
«Ótken jyly Qazaqstan men Frantsııa arasyndaǵy dıplomatııalyq qarym-qatynastyń 25 jyldyǵyn atap ótsek, bıyl elderimiz arasyndaǵy strategııalyq seriktestiktiń 10 jyldyǵyn atap ótpekpiz. Osy jyldar boıy Frantsııa bizdiń dosymyz ári senimdi seriktestigimiz bolǵany barynsha mańyzdy. Biz ekonomıka, bilim, ǵylym, bıznes, týrızm syndy birqatar baǵytta yntymaqtastyqtamyz. Búgin osy zalda Qazaqstanda jumys isteıtin frantsýz bıznesiniń ókilderi otyr. Osy múmkindikti paıdalana otyryp, Qazaqstan Úkimeti sizderdi baǵalaıtyndyǵyn ári barlyq deńgeıde qoldaý kórsetetindigin atap ótkim keledi», - dedi QR Premer-Mınıstri.
Sonymen qatar, ol Frantsııa Qazaqstannyń Eýropadaǵy negizgi saýda seriktesteriniń biri ekendigin basa aıtty.
«Búginde Qazaqstanda frantsýz kapıtalynyń qatysýymen 140-qa jýyq birlesken kompanııa jumys isteıdi. Olardyń qatarynda Alstom, Airbus syndy iri kompanııalardyń ókilderi bar. Biz frantsýz bıznesi Qazaqstanda ózin barynsha jaqsy sezingenin qalaımyz jáne bul baǵyttan belsendi jumys júrgizip jatyrmyz»,- dedi Baqytjan Saǵyntaev.
Úkimet basshysy qazirgi ýaqytta Frantsııa azamattary Qazaqstanǵa vızasyz kele alatyndyǵyn eki eldiń arasynda tikeleı áýe reısi ashylǵandyǵyn atap ótti.
«Qazirgi ýaqytta Qazaqstan óz damýynyń óte qyzyqty ári qarqyndy kezeńinde tur. Ótken jyly ekonomıka ósimi 4 paıyzdy qurap, ónerkásiptiń turaqty ósimi tirkeldi. Biz osy oń dınamıkany saqtap, arttyrýǵa nıettimiz», - dedi ol.
