Frantsııanyń ekonomıka jáne qarjy mınıstri Qazaqstanǵa keldi
NUR-SULTAN. QazAqparat – Frantsııanyń ekonomıka jáne qarjy mınıstri Brıýno Le Mer elordaǵa issaparmen keldi. Bul – onyń Ortalyq Azııaǵa alǵashqy sapary, dep habarlaıdy QazAqparat tilshisi.
Іssapardyń negizgi maqsaty – Qazaqstanmen jańa seriktestik qarym-qatynastar ornatyp, yntymaqtastyqty nyǵaıtý.
«Bizde ıadrolyq salada, ushaq shyǵarýda (Airbus), qujattama qaýipsizdigi, energetıka (Total) salasynda yntymaqtastyq ornatylǵan. Barlyq jobalarymyzdyń sátti júzege asqanyn qalaımyz», - dedi Frantsııa mınıstri astanadaǵy «Elektrovoz qurastyrý zaýytynda» tilshilerge bergen suhbatynda.
Mınıstr temirjol kóligine júıeler men qural-jabdyqtar shyǵaratyn frantsııalyq Alstom kompanııasynyń Nur-Sultandaǵy jumysymen tanysty.
«Bul zaýyt Qazaqstan men Frantsııa arasyndaǵy ekonomıkalyq yntymaqtastyqtyń aıǵaǵy ispettes. Temir joldy damytý salasyndaǵy seriktestik bizdiń elimiz úshin mańyzdy strategııalyq baǵyt bolyp sanalady. Men úshin Ázerbaıjanǵa eksportqa baǵyttalǵan lokomotıvtiń saltanatty ashylýyna qatysý – úlken ǵanıbet. Eki el arasyndaǵy temirjol salasyndaǵy seriktestik qarym-qatynasty jalǵastyramyz. Atap aıtqanda, jolaýshylar jáne júk lokomotıvterin óndirý jáne sıgnalızatsııa salalarynda. Dabyl qaǵý boıynsha biz úshin mańyzdy jobalar bar. Alstom kompanııasynyń Qazaqstannyń temir jol vokzaldaryn dabyl qaǵý júıesimen jabdyqtaýyn qalaımyz», - dedi ol.
Sapar barysynda Frantsııanyń ekonomıka jáne qarjy mınıstri Brıýno Le Mer «Elektrovoz qurastyrý zaýytynyń» óndiristik bólikterimen tanysty. Oǵan Ázerbaıjan temir jolymen kelisimshart aıasynda ázirlengen №Z8A0008 lokomotıvin kórsetti. Atalǵan kelisimshartqa sáıkes, Ázerbaıjanǵa 50 lokomotıv qurastyrylmaq.
Búgin Frantsııa mınıstri QR Prezıdenti Qasym-Jomart Toqaevpen, QR Premer-Mınıstri Asqar Mamınmen jáne QR Premer-Mınıstriniń orynbasary Jeńis Qasymbekpen kezdesedi.
«Temirjol salasynan bólek, Qazaqstan – Frantsııanyń
strategııalyq áriptesi. Qazaqstan úshin Frantsııa – Eýropaǵa enýdegi senimdi
seriktes. Frantsııada jańa damyǵan tehnologııalar bar, ónerkásip salasy jaqsy
damyǵan. Sondyqtan, Frantsııa Qazaqstanmen yntymaqtastyq ornatqysy keledi. Sálden
soń, Qazaqstan Respýblıkasynyń Prezıdentimen jáne Premer-Mınıstrimen kezdesemin. Onda QR Tuńǵysh Prezıdenti
Nursultan Nazarbaevtyń tusyndaǵy tyǵyz áriptestikti eske salsam deımin. Jáne taǵy qandaı baǵyttarda yntymaqtastyqty
damyta alamyz, sony talqylaǵym keledi», - dedi Brıýno Le Mer.
